“Skai i Soim . . .”
San i stap longwe long graun inap olsem 150 milion kilomita na i lait bikpela tumas long skai. Tru inap planti tausen yia ol man i bin lotuim san olsem wanpela god, tasol gutpela san i kamapim klia olsem Man bilong wokim san, em man bilong “heven na graun,” em i gat bikpela strong moa. (Song 115:15) Lait na hat bilong san i mas holim ol samting i gat laip long graun bambai ol inap i stap laip. Yumi save long planti samting bilong san ol saintis i bin kisim save long en, na yumi pilim olsem san em i bikpela samting tru.
Ol i tok san i save kamapim bikpela strong, olsem hat na lait. Tasol liklik liklik hap tasol bilong dispela hat na lait i save holim graun. Olsem wanem? Yu bin save long dispela samting?
San i kamapim bikpela strong olsem wanem? Wanpela bikpela paia, olsem bom nuklia i stap insait tru long san. Dispela paia i mekim wok long ges haidrojen bilong kamapim dispela strong. Paia i mekim wok long 3.6 ton bilong dispela haidrojen long olgeta wan wan sekon. Yumi ken amamas long planti haidrojen i pulap long san inap long san i kamapim dispela strong i go inap planti bilion yia bihain, na yumi no inap sot long dispela samting.
Sampela samting ol saintis i bin kisim save long en i save kamapim sampela askim moa olsem: Long olgeta taim san i save meknais. Bilong wanem em i mekim olsem? Na tingim dispela samting: Dispela paia i stap insait tru long san em i hat tumas winim ol narapela hap bilong san—ol hap i stap klostu long skin bilong san i no hat olsem long namel. Tasol long ausait, win bilong san ol i kolim korona, hat bilong en i winim hat bilong ol hap i stap klostu long insait tru bilong san. Bilong wanem?
Na tu, olsem graun i save tantanim, san tu i mekim olsem. Tasol ol hap bilong san i save tantanim long narapela narapela spit. Olsem: Skin bilong san i save tantanim hariap, tasol ol hap long namel i no hariap olsem. Na san i gat sampela mak i kamap long skin bilong en tu. Long olgeta 11-pela 11-pela yia ol dispela mak i save kamap na bihain ol i pinis. Bilong wanem san i mekim ol dispela samting?
I gat planti samting moa bilong san yumi inap kisim save long en, tasol ol samting yumi save pinis long en i mekim na yumi pilim tru olsem Man bilong wokim san, em Jehova, em i Bikpela man tru. Taim yumi lukim san, dispela i kirapim tingting bilong yumi olsem: “Skai i soim yumi olsem God i nambawan tru. Olgeta samting bilong antap i soim yumi gutpela wok bilong em.”—Song 19:1.