Askim

Matyu 28:17 i makim olsem bihain tru long Jisas i kirap bek na kamap long ai bilong ol aposel, sampela aposel i gat tupela tingting yet long em o olsem wanem?

Yumi no ken ting Matyu 28:​16, 17 i tok olsem. Em i tok: “Ol 11-pela disaipel i wokabaut i go long Galili, na ol i kamap long dispela maunten Jisas i bin tok bai ol i mas i go long en. Na ol i lukim Jisas, na ol i lotu long em. Tasol sampela i gat tupela tingting.”

Taim em i no dai yet, Jisas i laik helpim ol disaipel long save, “em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na bai ol i kilim em i dai, na long de namba 3 bai em i kirap bek.” (Matyu 16:21) Tasol maski em i tokim ol olsem, taim ol birua i holim em na kilim em i dai, ol i bel hevi na tingting planti. Ating ol i kirap nogut taim ol i save em i kirap bek pinis. Na taim em i kamap long ai bilong ol na tanim i kamap man, pastaim sampela “i amamas tru, tasol ol i no bilip yet.” (Luk 24:​36-41) Tasol taim em i kirap bek pinis na kamap long ai bilong ol gutpela disaipel, dispela i bin helpim ol long bilip tru olsem em i kirap bek pinis; aposel Tomas tu i bilip tru olsem Jisas i kirap bek pinis.​—⁠Jon 20:​24-29.

Bihain ol 11-pela gutpela aposel “i go long Galili.” (Matyu 28:16; Jon 21:⁠1) Taim ol i stap long dispela hap, “planti brata wantaim i lukim [Jisas], namba bilong ol i winim 500.” (1 Korin 15:⁠6) Taim Matyu 28:17 i tok “sampela i gat tupela tingting,” em i stori long dispela taim ol i stap long Galili. Olsem na ol disaipel i gat tupela tingting, ating ol i bilong ol dispela 500.

Tingim tok em namba wan presiden (C. T. Russell) bilong Sosaiti Was Taua i bin mekim, olsem:

‘Ol 11-pela aposel i no insait long dispela lain ol i gat tupela tingting, long wanem, ol aposel i bilip tru olsem Jisas i kirap bek pinis na ol i bin tokaut olsem. Olsem na ol man i gat tupela tingting, mipela i ting ol i bilong ol dispela ‘500 brata’ i bin bung long maunten, em namba wan taim ol i bin lukim em bihain long em i kirap bek. Ating bilip bilong sampela i no strong olsem ol aposel na ol gutpela pren em Jisas i toktok pinis wantaim ol. Dispela tok “sampela i gat tupela tingting,” i kamapim klia olsem hap bilong Matyu i no haitim rong bilong man. Na em i kamapim klia olsem ol disaipel bilong Jisas ol i no bilip nating; ol i save skelim gut ol samting pastaim. Bihain ol i givim bel olgeta long mekim wok bilong em na dispela i kamapim klia ol i bilip tru olsem Jisas i kirap bek pinis, na long dispela as tasol ol i bilip long em​—⁠long dispela as yumi tu i bilip long em. Sapos tru God i no bin kirapim bek Krais, orait bilip bilong yumi i lus nating na yumi stap yet long sin bilong yumi.​—⁠1 Ko 15:17.’​—⁠Zion’s Watch Tower and Herald of Christ’s Presence, Me 1, 1901, pes 152.

Matyu i kamapim rong bilong ol wanbilip na em i no haitim, na dispela i makim olsem ol tok bilong Baibel i tru. Sapos man i kamapim wanpela stori i giaman, em i mas kamapim planti liklik tok bilong helpim dispela stori bambai ol man inap bilipim. Orait, olsem wanem long Matyu?

Em i no pilim olsem em i mas kamapim planti liklik tok bilong helpim ol man long save husat tru “i gat tupela tingting.” Nogat. Hap bilong Mak, Luk, Jon, i no stori long dispela samting, olsem na sapos man i kaunim tasol tok bilong Matyu, em bai ting olsem em i makim ol 11-pela aposel. Tasol maski Matyu i stori long wanem lain, em i mekim liklik tok tasol na em i no mekim sampela tok moa bilong kamapim klia husat tru i gat tupela tingting. Inap 14 yia bihain, aposel Pol i raitim hap bilong 1 Korin. Ol tok em i kamapim long 1 Korin 15:6 i helpim yumi long save, ol aposel i no insait long dispela lain i gat tupela tingting; nogat; dispela lain em ol disaipel i stap long Galili, em Jisas i no bin kamap yet long ai bilong ol. Olsem na dispela tok bilong Matyu olsem “sampela i gat tupela tingting,” dispela tok em i tru, maski Matyu i no kamapim planti liklik tok.