Askim

Ol Kristen i no save pilai laki bilong winim mani, tasol olsem wanem: Ol inap kisim nating wanpela tiket o go insait long samting olsem bilong winim prais?

Planti man i bin askim olsem, na bekim i bin kamap long ol buk samting bilong Sosaiti. Sosaiti i bin wokim indeks bilong ol buk bilong sampela tok ples. (Watch Tower Publications Index 1930-1985, na bilong 1986-1990). Sapos dispela samting i stap long tok ples bilong yu, em i ken helpim yu long painim bekim bilong dispela askim.

Bekim bilong dispela askim i stap long nius Kirap! bilong Janueri 8, 1977, long pes 21 na 22, na het-tok bilong en i tok, “Olsem Wanem long Laki-Tiket?”

Dispela nius i tok, ol Kristen i save abrusim pasin bilong baim tiket na kisim laki-tiket na bai em i ken winim prais. Sapos yumi tromoi mani o baim tiket na bai yumi ken winim sampela mani moa, dispela i olsem pasin mangal. Olsem na ol Kristen i save abrusim dispela pasin bilong kisim laki-tiket.​—⁠1 Korin 5:11; 6:10; Efesus 4:19; 5:​3, 5.

Sampela stua o bisnis i laik bai ol man i ken kam long stua bilong ol na baim ol samting long dispela stua, na ol i mekim sampela samting bilong pulim ol man i kam, olsem givim nating wanpela tiket long ol. Stua i tok, sapos yumi raitim nem bilong yumi long dispela pepa o tiket samting na yumi givim long stua, ating yumi inap winim prais, maski yumi no bin tromoi mani bilong kisim dispela tiket. Sampela Kristen i ting i no gat rong long kisim dispela prais na bel bilong ol i no gat tok, long wanem, ol i no bin baim dispela tiket​—⁠stua i givim nating long ol. Ol i ting i wankain olsem sampela stua i mekim, em ol i givim nating sampela samting bilong stua long Kristen na bai em i ken traim dispela samting, na sapos em i laikim em i ken kam bek gen na baim ol samting long dispela stua.

Tasol sampela Kristen i no laik mekim olsem, long wanem, nogut sampela i gat tok long ol, na nogut sampela i gat hevi o nogut dispela i pundaunim sampela; na ol i laik i stap longwe long pasin bilong laki, nogut dispela i pulim ol na ol i kirap na givim bel long dispela samting. Aisaia 65:11 i toktok long ol man i laikim tumas laki na winim mani na i tok: “Yupela i save lotuim . . . ol giaman god yupela i ting ol i save mekim yupela i win na yupela i gat gutpela taim.” Ating sampela bilong lain bilong God i no laik insait long ol samting man i mas mekim taim em i winim prais bilong laki-tiket o kain tiket olsem, tasol nogut ol i gat tok long sampela Kristen em bel bilong ol i no gat tok long kisim nating tiket bilong stua samting na ol i winim prais.​—⁠Lukim Rom 14:​1-4.