Baptais Bilong Jon

JON em i pikinini bilong Sekaraia na Elisabet (Luk 1:5-7, 57), na em i namba wan man God i makim bilong givim baptais long ol man, na em i baptaisim ol insait long wara. Olsem na em i kisim nem olsem “Jon, man bilong givim baptais.” (Matyu 3:1; Mak 1:4) Ensel Gebriel i tok, God i givim dispela wok long em, na wok bilong autim tok tu. (Luk 1:​13-17) Na spirit holi i stap long Sekaraia na em i tok profet olsem: Jon bai stap profet bilong Jehova, bilong i go pas na redim rot bilong Jehova. (Luk 1:​68-79) Na Jisas i strongim dispela tok. (Luk 7:​26-28) Luk i tok, God i givim tok long Jon na em i autim tok bilong baptais. (Luk 3:⁠2, 3) Na aposel Jon i tok, Jon Bilong Baptais i bringim tok bilong God i kam.​—⁠Jon 1:⁠6.

Luk 3:3 i tok: “Jon i go long olgeta hap i stap klostu long wara Jordan, na em i autim tok long ol manmeri i mas tanim bel na kisim baptais, na bai God i tekewe sin bilong ol.” Tasol i no wara i “tekewe sin,” nogat. Ol i “tanim bel” na senisim pasin bilong ol, na baptais i makim ol i bin mekim olsem.

Dispela baptais Jon i bin givim long ol em i bilong makim ol i tanim bel na ol i hevi long ol sin ol i bin mekim long brukim Lo em i bilong bringim ol i kam long Krais. (Galesia 3:24) Wok Jon i mekim i bilong “olgeta manmeri bilong graun bai i lukim wok God i mekim bilong kisim bek yumi” (Luk 3:⁠6), na bilong “stretim tingting bilong ol man bilong sakim tok, na ol bai i kisim gutpela tingting . . . Em bai i redim ol man na ol i stap redi long Bikpela i kam.”​—⁠Luk 1:​16, 17.

Sampela man i bin ting, ol pasin ol i bin mekim long bipo tru taim ol i stap aninit long Lo em i makim baptais Jon i bin mekim na baptais ol Kristen i save kisim, tasol nogat. (Kisim Bek 29:4; Wok Pris 8:6; 14:8, 31, 32) Ol dispela pasin ol i bin mekim bipo em bilong mekim ol i kamap klin long ol samting bilong lotu. Na sapos man bilong narapela lain i laik kaikai samting bilong Pasova o kam insait long dispela lotu, em i no gat wok long kisim baptais; ol i mas katim skin bilong em, na baptais nogat.​—⁠Kisim Bek 12:​43-49.

Na sampela man i bin tok, pasin bilong baptaisim ol man, em Jon i bin kisim long ol Farisi. Tasol nogat. Ol i gat ol narapela pasin, na ol i mas mekim long olgeta taim, na Jisas i tok, ol yet i bin kamapim, na ol i kalapim lo bilong God. (Mak 7:​1-9; Luk 11:​38-42) God yet i bin givim dispela wok long Jon long baptaisim ol man long wara. (Jon 1:33) Na em i baptaisim ol Juda tasol.​—⁠Luk 1:16.

Jon i save ol samting em i mekim i bilong redim rot bilong Jisas i ken kirap mekim wok bilong em, na mekim bikpela wok moa, winim wok bilong Jon, na Jon i bilong helpim ol Juda na bai ol i ken save, Mesaia i kam pinis na i stap, em dispela man God i tok promis long salim i kam. (Jon 1:31) Wok bilong Mesaia bai go bikpela, na bilong Jon bai go liklik. (Jon 3:​26-30) Taim Jisas i bin stap long graun na ol disaipel i baptaisim ol man i bin tanim bel, ol i bihainim baptais bilong Jon, na ol dispela man tu i kamap disaipel.​—⁠Jon 3:​25, 26; 4:​1, 2.

This article is unique to PNG.