Ol Famili Bilong Yu i Dai Pinis—Ol i Stap We?
BEL bilong Alec i bagarap—insait long wanpela wik tasol tupela gutpela pren bilong em i dai. Wanpela, em Nevil, ol i sutim em long gan. Narapela, em Tony, em i bagarap long ka. Alec em i bilong Saut Afrika na em i gat 14 krismas, na nau em i kirap tingim sampela askim bipo em i no tingim, olsem: ‘Bilong wanem ol man i mas i dai? Wanem samting i save painim man i dai pinis?’
Em i go bilong planim Nevil na em i ting, pris bai bekim ol dispela askim. Tasol nogat. Em i tok: “Pris i kaunim tasol sampela tok long wanpela buk na em i tok, Nevil i go long heven. Na long ples matmat, em i tok yumi wet long kirap bek. Mi paul nau. Sapos Nevil i stap long heven, bilong wanem em i wet long kirap bek?”
Bihain, long dispela de yet, Alec i go bilong planim Tony. Pris i mekim lotu long tok ples Alec i no save long en, na sampela ol i krai nogut tru na mekim nabaut. Alec i pilim olsem ol tok bilong pris i no mekim isi bel bilong ol. Em i tok: “Long dispela nait, bel bilong mi i bagarap stret. Mi pilim olsem mi lus olgeta. No gat man inap bekim gut ol askim bilong mi. Nau long namba wan taim mi tingting olsem: God i stap o nogat?”
Long olgeta yia, i gat planti milion manmeri olsem Alec, em wanpela famili o gutpela pren bilong ol i dai. Wanpela buk i tok: “Long yia 1991, long olgeta hap bilong graun, 50,418,000 i dai pinis.” (1992 Britannica Book of the Year) Na bihain long dispela, planti milion moa i bin dai, a? Tingim bikpela aiwara bilong ol manmeri i krai sori long ol! Na ol i bel hevi moa, long wanem, ol i no save gut wanem samting i painim man i dai pinis; i gat kain kain tingting long dispela na ol dispela tingting i pait.
Olsem Alec, planti ol i no bilip moa olsem ol inap i stap laip yet bihain long taim ol i dai. Wanpela buk i tok: “Long olgeta taim, i gat sampela man ol i gat gutpela tingting na ol i no bihainim tingting bilong ol narapela man . . . ol i no bilip olsem man i gat tewel em inap i stap laip yet taim bodi na kru i dai pinis.”—Encyclopedia of Religions.
Na dispela buk i tok, Baibel i no helpim dispela bilip olsem yumi gat tewel na bilong en yet em inap i stap oltaim. Na hap tok Grik (psy’khe) ol i tanim sampela taim long ol Baibel tok Pisin olsem “tewel,” ol i mas raitim olsem “man” o “laip” samting, long wanem, dispela tok Grik i makim ol samting bilong graun i gat skin na blut, olsem man na animal samting, em ol samting yumi inap lukim. (Stat 1:20; 2:7) Baibel i tok klia, taim yumi dai laip bilong yumi i pinis; yumi no i stap moa. (Aisaia 26:14; Song 146:4) Baibel i tok, taim yumi dai yumi “no inap save long wanpela samting” o mekim wanpela samting.—Saveman 9:5, 10.
Tasol Baibel i stori long sampela man i dai pinis ol i kisim laip gen, olsem Lasarus. Em i dai pinis na 4-pela de bihain em i kisim laip gen. (Jon 11:39, 43, 44) Tasol olsem wanem long ol manmeri i dai planti tausen yia bipo? Yu ting God bai kirapim bek ol wantaim olpela skin bilong ol?
Nogat. Olpela skin i tanim i kamap gris bilong graun, na gras samting klostu long matmat i pulim dispela gris, na ating wanpela animal i kaikai dispela gras na nau dispela gris i stap insait long skin bilong en.
Olsem na ating ol manmeri i dai longtaim bipo, ol i lus olgeta? Nogat. Man bilong wokim olgeta samting long skai na long graun em inap tingim olgeta samting. Em inap tingim olgeta tingting na pasin bilong man na kirapim bek em sapos em i laik. Na God Jehova i gat strong inap long wokim gen bodi i wankain stret olsem bipo na bekim bek olgeta tingting na pasin bilong man wankain olsem bipo. Em bai mekim olsem long ol man em i tingim, olsem Abraham.
Klostu 2,000 yia bihain long taim Abraham i dai, Krais Jisas i tok: “Moses tu i bin soim yumi olsem ol man i dai pinis, ol i save kirap bek long matmat. Long dispela stori bilong liklik diwai i paia, em i bin tok olsem, Bikpela em i stap God bilong Abraham na bilong Aisak na bilong Jekop. Dispela i soim yumi olsem God em i no God bilong ol man i dai pinis. Nogat. Em i God bilong ol man i stap laip.” (Luk 20:37, 38) Abraham na Aisak na Jekop na planti milion manmeri moa i dai pinis, ol i stap laip long tingting bilong Jehova, na ol i wet long kirap bek. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15.
Tupela gutpela pren bilong Alec i dai na sampela wik bihain em i kisim save long bekim bilong ol askim bilong em. Wanpela Witnes Bilong Jehova i kam long haus bilong em na soim ol tok bilong Baibel long em i stori long i dai na kirap bek. Dispela i mekim isi bel bilong Alec na nau em inap wetim gutpela samting i kamap.
Yu laik kisim sampela save moa long tok promis bilong Baibel long kirap bek? Yu laik save, planti bai ol i kirap bek na i stap long heven o long graun? Yu laik save man i mas mekim wanem na bai God i orait long em, na taim God i truim tok promis bilong em, bai em inap bung gen wantaim ol famili bilong em na ol gutpela pren i dai pinis?