Rait i Gat Bikpela Insait Bilong En
“IEHOVA SIT TIBI CUSTOS”
DISPELA tok i stap long banis long poret bilong wanpela haus bilong yia 1600 samting, long Selerina, long hap is bilong Swiselan. Insait bilong en i olsem “Jehova bai lukautim yu.” Long dispela hap i gat ol maunten, yumi ken lukim nem bilong God planti taim long ol olpela haus, na haus lotu, na haus bilong ol pasto. Olsem wanem ol man i bin save gut long nem bilong Jehova?
Risia long bipo (nau hap bilong en em saut-is Jemani, na Ostria, na hap is bilong Swiselan) i kamap provins bilong Rom long yia 15 paslain long Krais. Ol manmeri i sindaun long dispela hap i kirap long mekim tok ples Romans, em wanpela bilong ol tok ples i kamap long tok ples Rom. Long nau sampela man long ol ples maunten bilong Swiselan na long hap not bilong Itali i mekim yet dispela ol tok ples.
Bihain ol i bin tanim sampela hap bilong Baibel long tok ples Romans. Wanpela Baibel, em Biblia Pitschna, i gat Buk Song na Nupela Testamen long en. Long dispela Baibel, ol i wokim long 1666, nem Iehova i stap planti taim long Buk Song. Namba wan samting ol man i bin kaunim long haus em Baibel, olsem na ol man i kaunim dispela Baibel i bin kisim save long nem bilong Man i wokim olgeta samting.
Tasol ol lain i kamap bihain i no laik save tumas long ol samting bilong Baibel. Na planti i no laik save long insait bilong tok “Iehova,” na ol pris pasto i no strong long kamapim insait bilong en. Olsem na ol dispela rait i kamap olsem bilas bilong bipo tasol.
Long nau i gat wanpela bikpela wok i kamap bilong skulim gen ol man. Ol Witnes Bilong Jehova bilong ol ples daun i bin kam long hap bilong ol dispela naispela maunten long taim bilong malolo, na ol i skulim ol asples long God, nem bilong em Jehova. Na sampela Witnes i kam sindaun long dispela hap na bai ol i gat hap taim moa bilong skulim ol man long ol samting Jehova i laik mekim long dispela graun na long ol man. Olsem na taim ol man i kisim save long trupela God Jehova, ol i kisim save long insait bilong ol dispela rait long tok ples Romans bilong bipo.
[Ol Piksa long pes 32]
IEHOVA PORTIO MEA: Bikpela [Jehova, “NW”], yu tasol yu inap long mi.—Lukim Song 119:57