Yumi Inap Wokim Ol Samting—Em Gutpela Presen God i Givim
JEHOVA i amamas long ol samting em i wokim. (Song 104:31) Dispela samting i mekim Jehova i stap belgut tru olsem Stat 1:31 i tok: “God i lukim olgeta dispela samting i gutpela, na em i amamas tru.”
Jehova i no pasim ol narapela long kisim kain amamas olsem. Em i givim gutpela wok long Jisas, olsem wokman o rot bilong wokim olgeta narapela samting. (Jon 1:3; Kolosi 1:16, 17) Jisas em “saveman i bosim wok” na em i bin ‘stap amamas oltaim long ai bilong Jehova.’—Sindaun 8:30, 31.
Tasol i no ol man bilong heven tasol inap long wokim ol samting. Long buk How Creative Are You? Eugene Raudsepp i tok: “Dispela laik i stap insait long ol man.” Dispela i no kamap nating, nogat; God i wokim man olsem em yet. (Stat 1:26) Yes, Jehova i wokim man bai em inap long wokim ol samting na amamas long en.—Jems 1:17.
Olsem na yumi no kirap nogut taim Baibel i mekim gutpela tok long ol man i wokim ol samting, olsem singsing, danis, wokim tret, kukim kaikai, wokim haus na ol kain kain samting. (Kisim Bek 35:25, 26; 1 Samuel 8:13; 18:6, 7; 2 Stori 2:13, 14) Besalel i gat save long kain kain wok, na em i kamapim save bilong em bilong helpim wok bilong wokim haus sel bilong God. (Kisim Bek 31:3, 4) Wanpela wasman bilong sipsip, em Jabal, ating em i bin wokim namba wan haus sel. Em wanpela gutpela samting bilong helpim ol man i no stap long wanpela ples. (Stat 4:20) Devit i bin pilaim musik na raitim musik, na em i wokim tu ol nupela samting bilong mekim musik. (2 Stori 7:6; Song 7:17; Amos 6:5) Ating Miriam i bin stretim ol samting bilong bikpela danis i kamapim amamas bilong ol Israel long God i wokim mirakel na ol inap brukim solwara Retsi.—Kisim Bek 15:20
Sapos man inap long wokim ol samting dispela inap helpim lotu i tru. Jisas i bin kamapim ol tok bokis na mekim wok long ol kain kain samting bambai ol man i ken save long tok bilong em. Ol man i bihainim Jisas, ol tu i mas ‘hatwok long autim tok na skulim ol man.’ (1 Timoti 5:17) Wok autim tok ol i mekim ol i no inap mekim nating. Ol i mas painim ol gutpela gutpela rot bilong skulim man. (Kolosi 4:6) Na dispela em i bikpela samting tru taim ol i skulim pikinini bilong ol.—Lo 6:6, 7; Efesus 6:4.
Tru tumas, dispela amamas Jehova i save kisim taim em i wokim ol samting, em i givim long ol narapela tu. Em wanpela gutpela presen tru!