Ol Meri Long Olgeta Hap Bilong Graun
TAIM namba wan man na meri i bikhet long God, Jehova i tok profet long ol bikpela hevi bai painim ol na ol pikinini bilong ol. Jehova i tokim Iv: “Bai yu gat bikpela laik yet long man bilong yu, na bai em i bosim yu.” (Stat 3:16) Planti taim Baibel i kirapim ol man long litimapim nem bilong ol meri, na planti milion meri i amamas na sindaun bilong ol i gutpela, long wanem, ol yet na famili bilong ol i bihainim tok bilong Baibel.
Wanpela ripot i skelim sindaun bilong ol meri i tok, long olgeta hap planti man i daunim ol meri, na ol i stap olsem ol wokmeri nating, na ol man i mekim hatpela pasin long ol. Wanpela nius (International Herald Tribune) i stori long dispela ripot na i tok: “Dispela ripot long ol meri long 193 kantri . . . i kamapim klia bikpela hevi i save painim ol meri long olgeta de, em ol man i save daunim ol na mekim nogut long ol.”
Olsem: Long sentral Afrika, ol pikinini meri i mas mekim klostu olgeta bikpela wok long fam. Long olgeta 4-pela 4-pela pikinini i save go long skul wanpela tasol em pikinini meri, na 3-pela em ol manki. Long wanpela kantri, gavman i tambuim ol meri marit long mekim pasin pamuk, tasol i no gat tambu long ol man marit i mekim. Lo bilong narapela kantri bilong Afrika i no gat tok long wanpela man marit i kilim i dai meri bilong em taim em i painimaut olsem em i pamuk, tasol lo i gat tok long meri i kilim i dai man bilong em taim man i mekim wankain pasin.
Ripot i tok long sampela hap bilong Saut Amerika, ol polis i no pilim hevi bilong ol meri em man bilong ol i paitim ol. Na ol meri i wok mani ol i kisim liklik pe tasol—em 60 i go inap 70 pesen tasol bilong mani ol man i save kisim.
Long sampela hap bilong Esia, ol i subim ol meri long mekim sampela samting na bai ol i no inap karim pikinini na ol i subim ol long rausim bel. Long wanpela kantri, i gat 500,000 pamukmeri. Planti bilong ol em papamama i baim ol i go long mekim dispela wok, long wanem, papamama i laikim mani bilong baim nupela haus bilong ol yet. Long narapela kantri planti yangpela meri marit i kisim birua—man bilong ol o famili bilong ol i kilim ol i dai, long wanem, famili bilong meri i no givim bikpela mani long famili bilong man taim ol i marit; dispela pasin i givim bikpela hatwok long ol polis.
Baibel i tok long Krais Jisas olsem: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.” (Song 72:12-14) Olsem na i gat as tru na yumi ken ting ol dispela hevi bai pinis; ol meri bilong olgeta hap i ken wetim gutpela samting bai kamap long dispela taim bihain.