‘Maski Win i Kam Long Wanem Hap, Em i No Inap Helpim Yu’
“TAIM man i no save wanem taun em i mas stiaim sip i go long en, orait maski win i kam long wanem wanem hap, dispela win i no inap helpim em.” Ating Lukius Anius Senika i mekim dispela tok—em wanpela saveman bilong Rom long taim bilong ol aposel—na dispela tok i kamapim klia wanpela tok i tru: Bilong i stap bilong yumi i gat as bilong en, yumi mas putim sampela samting olsem mak bilong winim.
Tasol i stap bilong planti man i no gat as bilong en. Ol i wok long abrusim ol hevi bilong olgeta de ol i olsem rip na bikpela si long solwara, na em tasol. Ol i no makim stret wanpela samting ol i laik winim, olsem na ol i kain olsem solwara em “win i sakim na i kirap nabaut.” (Jems 1:6) Long kain man olsem, “maski win i kam long wanem wanem hap, dispela win i no inap helpim em.”
Baibel i stori long sampela man ol i save putim sampela samting olsem mak ol i laik winim, na ol i stap olsem gutpela piksa bilong ol Kristen long nau i ken bihainim. Moses i “ting long dispela gutpela pe God i laik givim em.” (Hibru 11:26) Pol i tok: “Mi save ran strong bilong kamap long mak na kisim prais.” Em i kirapim ol wanbilip bilong em long ol tu i “mas bihainim dispela wankain tingting.”—Filipai 3:14, 15.
Gutpela sapos oltaim yumi lukluk i go long ol samting Baibel i tok promis long en, na bihainim pasin bilong bilip bilong ol dispela man i bin putim ol samting olsem mak bilong winim.—Skelim wantaim Hibru 13:7.