No Ken Bel Nogut Long Man
I OLSEM i hatwok tru long abrusim pasin bilong bel nogut long man taim em i mekim wanpela tok i sutim bel bilong yumi. Baibel i gat sampela gutpela tok bilong helpim yumi long kain taim olsem. Aposel Pol i tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun.”—Efesus 4:26.
Taim wanpela man i rongim yumi, bel bilong yumi i save hat liklik—em pasin bilong yumi ol man. Tok bilong Pol i makim olsem i no olgeta taim i gat rong long belhat; sampela taim ating i stret—olsem taim ol i mekim pasin i no stret long man, o kot i makim olsem em i gat asua long wanpela rong, tasol em i no gat asua. (Skelim wantaim 2 Korin 11:29.) Tasol sapos man i no stretim dispela kros, orait maski i gat as bilong kros bilong em, dispela kros inap kamapim bikpela hevi tru, na bihain em inap kirapim man long mekim bikpela rong. (Stat 34:1-31; 49:5-7; Song 106:32, 33) Olsem na taim wanpela i kirapim bel bilong yu na yu kros, yu ken mekim wanem?
Taim ol i mekim liklik rong tasol long yu, long planti taim olsem yu ken stretim dispela kros long bel bilong yu na “pasim maus,” o yu ken i go long man i bin rongim yu na toktok long dispela samting. (Song 4:4; Matyu 5:23, 24) Maski yu mekim wanem, i gutpela sapos yu stretim dispela tok hariap na bai pasin bilong bel nogut i no ken kamap long bel na i go bikpela na kamapim bikpela hevi tru.—Efesus 4:31.
Jehova i save lusim tingting long ol rong bilong yumi, na ol rong yumi no save yumi bin mekim. Orait, yumi tu i ken lusim tingting long ol liklik rong bilong narapela man, a?—Kolosi 3:13; 1 Pita 4:8.
Tok Grik yumi tanim olsem “lusim tingting long,” insait bilong en i olsem “lusim.” Taim yumi lusim tingting long rong bilong man, i no olsem yumi orait long en o yumi mekim olsem em i liklik samting tasol, nogat. Sampela taim yumi lusim dispela samting, long wanem, yumi save sapos yumi bel nogut i stap, dispela bai mekim hevi bilong yumi i go bikpela, na em bai bagarapim pasin wanbel long kongrigesen. Na tu, sapos yu bel nogut i stap, dispela inap givim sik long yu!—Song 103:9.