Ol Witnes i Kot na Kot i Pasim Tok

PLANTI taim ol i bin senisim de bilong kot, tasol bihain, long Jun 8, 1995, Kot Bilong Apil long Tesalonaika, Grik, i harim kot bilong 4-pela meri Witnes Bilong Jehova. Ol i sutim wanem tok long ol? Ol i tok, 4-pela meri hia i autim tok bilong kirapim ol man long kam insait long lotu bilong ol, na inap 50 yia lo bilong Grik i bin tambuim dispela kain wok.

Tasol long taim dispela kot i kamap, nambawan witnes long kot​—⁠em pris i bin kotim fopela meri​—⁠em i dai pinis. Narapela pris i laik senisim em bilong tokaut, tasol kot i no orait long em i mekim olsem. Olsem na yumi no kirap nogut long save, kot i stap inap 15 minit tasol! Jas i givim askim long ol narapela man bilong lain i sutim tok na em i tok, ol Witnes i no gat asua long brukim lo i tambuim ol man long autim bilip bilong kirapim man long kam insait long lotu bilong ol. Dispela tok ol i pasim long kot i makim olsem ol kot bilong Grik i laik daun na bihainim tok bilong Kot Bilong Yurop, em ol i pasim dispela tok long 1993.

Ol Witnes i kirap nogut tru taim 3-pela meri i bin helpim lain bilong sutim tok, ol i kam long ol Witnes i gat kot na tok amamas long ol i winim kot. Wanpela i tok: “Mipela i laik tok sori long ol samting i bin kamap. Mipela i no gat asua. Pris i bin subim mipela long sutim tok long yupela. Em i dai pinis, olsem na mipela laik bai yupela i kam long ples bilong mipela na long haus bilong mipela.”

Olsem na Jehova i larim lain bilong em long kantri Grik i winim kot gen. Ol i bin kamapim ol dispela lo i tambuim man long kirapim narapela man long senisim bilip bilong em long kantri Grik long 1938 na 1939. Long 1993 Kot Bilong Yurop i tok, i no stret long ol i mekim wok long dispela lo bilong mekim nogut long ol Witnes Bilong Jehova.​—⁠Lukim Wastaua, Septemba 1, 1993, pes 27-31.