Ripot Long Wok Bilong Kingdom
“Stap Olsem Lait Namel Long Ol Manmeri Bilong Dispela Graun”
OL WITNES Bilong Jehova i stap narapela kain long ol man bilong dispela graun, na planti taim ol man i save toknogutim ol, long wanem, ol i no save kisim blut. Tasol Baibel i as bilong dispela pasin bilong ol long sakim blut. Baibel i kamapim klia olsem God i nolaik tru long pasin bilong mekim wok nogut long blut, long wanem, blut em wanpela gutpela samting tru long ai bilong em. (Stat 9:3, 4; Wok Pris 17:14) Ol Witnes Bilong Jehova i bin skelim gut ol tok bilong Baibel long dispela samting, na ol i kisim save olsem tok bilong Baibel long yumi mas abrusim blut, em i makim tu dispela pasin bilong nau long givim blut long man.—Aposel 15:19, 20, 28, 29.
Nau long dispela taim, ol haus sik na haus kot long sampela kantri ol i helpim tok bilong ol Witnes Bilong Jehova long dispela samting. Long Denmak, wanpela yangpela mama em i save long lo bilong Baibel long blut, em i kisim bagarap long ka na em i dai. Em i strong long sakim blut, olsem na ol dokta bilong em i kirapim ol nius na televisen samting long toknogutim ol Witnes Bilong Jehova, na ol i mekim inap wanpela mun samting.
Papamama bilong yangpela meri i tokaut long laik bilong ol, ol i laik bai kot i ken skelim gut olsem i gat wanem as tru na pikinini bilong ol i dai. Orait long Epril 1994, wanpela kot bilong Denmak long skelim tok ol sikman i sutim long haus sik, em i tokaut olsem: I no olsem meri i sakim blut na long dispela as em i dai, nogat; em i dai, long wanem, ol dokta i no bin mekim gut wok bilong ol. Kot i bin pasim tok olsem taim em i skelim tok bilong wanpela lain (Board of Forensic Medicine) na ol lain bilong helt, em ol i bin glasim gut ol samting i bin kamap. Lain bilong helt (National Board of Health) i salim wanpela pas i go long olgeta haus sik na klinik samting long Denmak i tok, ol dokta i mas tingim ol Witnes i no laik kisim blut, olsem na ol i gat wok long givim ol gutpela marasin samting long ol Witnes i olsem senis bilong blut.
Na yumi ken tingim Dan, em wanpela yangpela Witnes i gat 15 krismas, na em i bin i dai long sik lukimia. Ol dokta i daun long tok bilong Dan olsem em i no laik kisim blut. Olsem na ol nius na televisen samting ol i kamapim bikpela toktok tru bilong dispela na ol i tok, em asua bilong ol dokta yet na Dan i dai. Tasol planti man i no wanbel long dispela tok bilong ol nius.
Het-tisa long skul bilong Dan em i kam long Haus Kingdom taim ol i mekim bung bilong planim Dan. Em i tokaut olsem ol dispela tok ol nius i bin mekim long i dai bilong Dan, ol dispela tok i no stret. Em i askim wanpela Witnes wanwok bilong em long ol Witnes Bilong Jehova, na em i kisim wanpela video long Witnes, nem bilong video, Jehovah’s Witnesses—The Organization Behind the Name. Em i laikim tru dispela video, olsem na em i stretim rot bambai olgeta tisa long skul i ken lukim. Bihain ol i soim long olgeta wan wan klas na olgeta sumatin i lukim.
Minista bilong helt long Denmak em tu i no wanbel long ol tok ol nius i bin sutim long ol dokta bilong Dan. Em i tok, ol dispela dokta i bin mekim pasin i stret na ol i daun long tok bilong Dan long em i no laik kisim blut, na ol i daun long bilip bilong em i gat as tru bilong en.
I gat planti milion manmeri bilong autim tok bilong Kingdom ol i save bihainim ol lo bilong God. Olsem na ol i save “stap olsem lait namel long ol manmeri bilong dispela graun.”—Filipai 2:12, 15.