Nambawan Pren Tru Bilong Ol i Strongim Ol
WANPELA pren i save strongim tru ol Witnes Bilong Jehova—em nambawan Pren tru bilong ol, God Jehova. (Skelim wantaim Jems 2:23.) Em i save sambai long ol long taim ol bikpela traim i painim ol bilong traim bilip bilong ol.
Planti man ol i bin lukim ol Witnes i holimpas bilip taim ol i stap kalabus aninit long ol hatpela gavman, na ol i amamas long dispela pasin bilong ol Witnes. Wanpela man em Jiří Krupička, em wanpela saveman i gat namba, em i bin i stap kalabus inap planti yia insait long ol banis kalabus bilong ol Komyunis, na long 1968 em i lusim Sekoslovakia. Long buk bilong em (Renesance rozumu), em i stori long ol Witnes i bin kalabus, long wanem, ol i no laik insait long pait, na ol i karim bikpela pen na hevi tasol ol i sanap strong.
Aninit long gavman Komyunis, planti Witnes ol i kalabus, long wanem, ol i holimpas bilip. Maski ol i stap kalabus, ol i no laik mekim wok long main bilong kisim yureniam, em bilong wokim ol samting bilong helpim pait. (Aisaia 2:4) Krupička i stori long samting em i bin lukim long wanpela main olsem, long 1952. Em i lukim tupela man i sanap long bikpela kol nogut tru na ol i olsem imis em ais i karamapim. Ol bikpela dram i karamapim het na bros bilong tupela.
Krupička i stori olsem: “Kirap long moningtaim tru ol i bin sanap ausait long dispela hap na ol i pasim ol pipia klos nogut i bruk bruk. Olsem wanem ol inap sanap longtaim na lek bilong ol i olsem ais pinis? Bilip bilong ol i strongim ol. Ol dram i olpela na i ros pinis. Wanpela man nogut i bin subim strong ol dispela dram long het na sol bilong tupela, olsem na arere bilong maus bilong dram i brukim kolsiot bilong wanpela na katim skin bilong em, na blut i wok long go daun long han bilong kolsiot.
“Mipela i sanap long lain na wokabaut i go, na gat bilong mipela i pasim mipela na mipela i sanap long ai bilong tupela man hia. Nau nambawan ofisa i givim wanpela tok long mipela. Em i tok, man i no laik wok, dispela em i pasin bikhet na man i mas kisim strafe. Ol tok giaman bilong ol long yumi no ken pait na kilim man i dai, dispela i no inap helpim ol dispela man i no laik insait long pait, em ol birua bilong pasin soselis.”
Orait ofisa i kisim wanpela hap ain na em i paitim wanpela dram. Man insait long dram i pundaun long graun na dram i karamapim yet het bilong em. Samting i kamap nau i pas strong long tingting bilong Krupička.
Em i tok: “Mi harim singsing i kamap insait long tupela dram. Na mi harim ol i beten isi isi long God, em inap harim olgeta samting long olgeta hap, na em inap harim ol i traim mekim singsing insait long ol dispela pipia dram yureniam i ros pinis. Em i harim gut olsem ol i singsing strong tru, winim ol lain i save singsing insait long wanpela traipela haus lotu.”
Long Septemba 1, 1993, gavman bilong Ripablik Sek i rausim tambu i stap long wok bilong ol Witnes na em i orait long en. Nau ol Witnes long kantri Sek i amamas long ol i stap fri long mekim wok Kristen bilong ol long autim tok na skulim ol man long tok bilong Baibel. Yes, ol i amamas tru long tokim ol man long Jehova, em i nambawan Pren tru bilong ol.
[Piksa long pes 7]
Ol i bung long kibung long Ripablik Sek