Ol i Daun Long Laik Bilong Sikman

‘Mi no inap katim yu sapos yu no laik kisim blut. Sapos yu laik bai mi katim yu, yu mas orait long pasin bilong mi long mekim dispela wok. Sapos nogat, orait yu mas painim narapela dokta.’

MASKI dokta i tok olsem, Cheng Sae Joo i no surik na lusim bilip liklik, nogat. Cheng Sae Joo em i wanpela Witnes Bilong Jehova na em i save sindaun long Tailan. Ol dokta i tok em i gat sik meninjioma, em wanpela kain buk i kamap long kru bilong em. Ol dokta i mas katim em hariap, nogut em i bagarap. Tasol em i strong long bihainim lo bilong Baibel i tok: “Yupela i no ken kaikai . . . blut.”​—⁠Aposel 15:​28, 29.

Cheng i traim tupela narapela haus sik, long wanem, em i laik bai ol dokta long kantri bilong em yet i ken stretim sik bilong em sapos ol inap. Tasol ol dokta long ol dispela narapela haus sik ol tu i no laik katim em sapos em i no laik kisim blut. Orait bihain Hospital Infomesen Sevis (HIS) long Tailan i stretim rot long wanpela haus sik long Japan (Tokyo Women’s Medical College) i katim em. Dispela haus sik i bin rausim buk long kru bilong 200 samting sikman na ol i mekim long wanpela kain naip ol i kolim naip gama, em wanpela nupela samting ol i kamapim na i wok long strong bilong rediesen.

Ol i stretim rot bambai Cheng i ken i stap wantaim sampela Witnes Japan ol i sindaun klostu long haus sik. Sampela Witnes bilong Jehova ol i bungim em long ples balus​—⁠tupela Witnes em ol i save long tok ples Tai, na wanpela em bilong lain Hospital Infomesen Sevis. Ol dokta i glasim em inap wanpela wik samting, na nau em i go long haus sik na ol i mekim wok long naip gama na rausim dispela buk. Bilong mekim olsem, ol dokta i wok inap olsem wanpela aua tasol. Long de bihain long en, Cheng i lusim haus sik, na long de bihain long dispela, em i go bek long Tailan.

Cheng i tok, “Mi kirap nogut long bikpela helpim mi kisim long dispela rot [bilong HIS]. Mi pilim tru pasin sori olgeta i bin mekim long mi, na pasin bilong ol long wok gut wantaim.”

Wanpela nius bilong Japan (Mainichi Shimbun) i kamapim stori bilong dispela samting na i tok: “Inap long nau ol nius i save toktok tasol long ol bilip bilong lotu i as na ol i no laik kisim blut. Tasol pasin bilong kisim blut em inap givim sik AIDS long man na ol narapela sik olsem hepataitis C, na sampela samting moa. Olsem na sampela sikman i no laik kisim blut, maski ol i gat wanem bilip.”

Na nius i tok moa olsem: “I gat planti sikman i bin sakim blut na haus sik i no laik helpim ol, olsem na ol i mas i go long narapela haus sik. Tasol ol haus sik i mas senisim dispela pasin bilong ol na ol i mas daun long laik bilong sikman. Taim dokta i mas mekim sampela samting bilong stretim sik bilong man, em i mas toksave long sikman long olgeta samting em bai mekim, na em i mas kisim tok orait long sikman, na dokta i mas mekim wankain pasin tu sapos em i laik givim blut long sikman. Ol dokta i mas save, em i no samting bilong wanpela lotu tasol.”

Planti man em ol i no laik kisim blut, ol i mas mekim olsem Cheng Sae Joo i bin mekim​—⁠ol i mas painim narapela haus sik. Tasol ol i pilim tru gutpela wok bilong ol dokta em ol i daun long laik bilong sikman.

Ol Witnes Bilong Jehova i bin kamapim dispela Hospital Infomesen Sevis long ol brens bilong Sosaiti Was Taua na bai ol dokta i daun long ol bilip bilong ol, ol i ken wok gut wantaim ol. Long olgeta hap, dispela lain HIS i wok strong long kamapim pasin bilong wok gut wantaim ol haus sik, ol dokta, ol man i gat wok long helpim ol sikman, ol loya, ol jas.