Ol i Kisim Strong Bilong Ol Long We?
SAPOS yu lukluk gut long dispela bataplai i stap long piksa, bai yu luksave olsem wanpela bilong fopela wing bilong en i bagarap olgeta. Tasol dispela bataplai i wok yet long kaikai na flai. Dispela em i no narakain samting. Ol man i bin lukim ol bataplai i go nabaut na mekim wok bilong ol long olgeta de maski 70 pesen bilong wing bilong ol i bagarap pinis.
Olsem tasol, planti manmeri i save soim olsem ol inap wok strong yet. Maski ol i gat ol bikpela sik long skin o bikpela bel hevi, ol i no les na lusim wok.—Skelim wantaim 2 Korin 4:16.
Aposel Pol yet i bin karim ol bikpela hevi taim em i mekim ol raun bilong em long wok misineri. Ol i bin paitim em, tromoi ston long em, paitim em long stik samting na putim em long kalabus. Antap long ol dispela hevi, em i gat wanpela hevi long skin bilong em yet, ating em hevi bilong ai bilong em, em i olsem “nil i sutim skin” bilong em.—2 Korin 12:7-9; Galesia 4:15.
Wanpela elda Kristen, nem bilong em David, em i bin wok strong long winim bel hevi em i kisim oltaim inap planti yia, em i bilip olsem strong bilong Jehova i bin helpim em long kamap orait gen. “Planti taim ol hatwok bilong mi long winim dispela kain bel hevi i olsem i lus nating.” Em i tok moa, “Long taim dispela samting i daunim mi, mi save putim olgeta hevi bilong mi long Jehova, na em i save strongim mi tru. Sampela taim mi bin beten inap sampela aua. Taim mi toktok long Jehova, tingting bilong mi olsem mi stap wanpis na mi no inap mekim wanpela samting i pinis. Mi bin taitim bun tru long winim long taim mi no gat strong, tasol mi tenkyu long Jehova, long wanem, mi no gat strong tasol em i bin givim strong long mi—na strong bilong helpim ol narapela tu.
God Jehova i bin strongim Pol. Olsem na, em inap tok: “Taim mi no gat strong, long dispela taim tasol mi gat strong tru.” (2 Korin 12:10) Tru, ol samting Pol i no strong long en i lainim em long mekim wok long strong God i givim long em. Aposel Pol i tok: “Krais i save strongim mi, na long strong bilong em mi inap mekim olgeta samting.” (Filipai 4:13) Tru tumas, Jehova i save strongim ol wokman bilong em.