Lainim Ol Taim Ol i Liklik Yet

OL WOK bilong skelim ol samting long nau i soim olsem “pikinini i stap yet long bel bilong mama i save harim nek bilong ol man.” Wanpela nius (Winnipeg Free Press) i tok: Ol lain bilong skelim ol samting long Yunivesiti Bilong Not Karolaina i “kisim save olsem taim mama i kaunim ol tok long pikinini i stap long bel, bihain taim mama i karim pikinini pinis na ol i kaunim dispela tok gen, pikinini i mekim samting i makim olsem em i save long dispela tok.” Sapos ol meri i gat bel i kaunim tok long strongpela nek, dispela inap helpim pikinini long kisim gutpela pasin. Baibel i tok, taim Timoti i liklik yet em i ‘kisim save long ol buk i gat tok bilong God long en.’ (2 Timoti 3:14, 15) Tru tumas, mama na tumbuna mama bilong Timoti i tingim tru wok bilong lainim em taim em i liklik yet, na ating ol i save kaunim ol tok long em.

Wanpela man bilong raitim buk (Jim Trelease) i tok: Pasin bilong kaunim tok em i “bikpela samting bilong helpim sindaun na wok bilong yumi long nau.” Pasin bilong kolim strong ol tok taim yumi kaunim i helpim tru yumi long kolim gut ol tok na tok ples.

Taim yu kirap long toktok long pikinini bilong yu, gutpela sapos long dispela taim yu kirap long kaunim ol tok long em. Pikinini i stap yet long bel bilong mama o mama i karim pinis​—⁠maski long namba wan taim em i no klia long ol tok yu kaunim, tasol dispela bai helpim pikinini long bihain. Sindaun 22:6 i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”

Yu inap kaunim wanem tok em i ken lainim na helpim pikinini? Kaunim strong tok bilong Baibel long pikinini bilong yu long olgeta wan wan de. Kaunim tu ol narapela gutpela buk olsem, Harim Tok Bilong Bikpela Tisa, Baibel Stori Buk Bilong Mi, Nambawan Man Tru i Winim Olgeta Narapela Man, na ol tok i stap long nius Wastaua na Kirap!

Tru, bilong mekim olsem yu mas lusim hap taim bilong yu, tasol yu mekim gutpela wok long dispela hap taim. Em i gutpela rot bilong kamapim klia olsem yu tingim na laikim tru pikinini bilong yu.