“Ating Mi No Driman, A?”
Ripot hia i kam long Malawi na i stori long wanpela “Amamas Long Litimapim Nem Bilong God” Kibung Distrik bilong ol Witnes Bilong Jehova em i bin kamap long dispela hap long taim bilong san long 1995.
“LONG wanpela bikrot, namel long nambis bilong raunwara Malawi long hap bilong wes, wanpela toksave i stap, na em namba wan taim insait long 29 yia ol i bin putim toksave olsem. Em i tok, ‘Kibung Distrik Bilong Ol Witnes Bilong Jehova.’
“Klostu long dispela toksave, wanpela traipela trak i sanap i stap na 200 manmeri bilong taun Mesusu i kalap i kam daun long trela bilong en. Ol i bringim klos, blanket, sospen, baket, kaikai, paiawut, na Baibel—ol i laik bung wantaim 3,000 brata na sista bilong ol, em ol i kam long ol narapela hap.
“Mipela i wok long sekanim ol man i lusim trak, na nau George Chikako, em i gat 63 krismas, em i kamap; em i wokabaut long wesan na subim wilwil bilong em. Inap tupela de em i bin kikim wilwil, kirap long Nekotakota na i kam. Long ol yia i go pinis, kot i bin putim Brata Chikako long kalabus 4-pela taim, long wanem, em i laik holimpas ol lo bilong Baibel. Long kalabus ol i bin paitim kasen brata bilong em na em i dai. Brata Chikako i tok: ‘Ating mi no driman, a? Ol i mekim dispela kibung long san, long ai bilong ol man, na dispela lain hia i mekim ol singsing bilong Kingdom long strongpela nek! Inap planti yia pinis mipela i save bung long nait, long tudak, na kolim isi tru tok bilong ol singsing bilong Kingdom, na taim mipela i laik paitim han, mipela i rapim tasol tupela han wantaim. Nau mipela inap bung long ples klia, na ol man ausait ol i kirap nogut long lukim mipela i planti, tasol pastaim ol i ting mipela i liklik lain tasol!’
“Ol i banisim ples kibung long kunai na wokim rup long pitpit samting olsem ples bilong hait long san. Ol i bin wokim ol liklik haus kunai na ol longpela haus olsem ples slip bilong ol man i kam bung. Long nait mipela i harim nek bilong ol brata sista i mekim gutpela singsing long strongpela nek—ol i no pret moa long sampela man i kam mekim nogut long ol.
“Olsem na as tok bilong kibung i stret long ol olsem, ‘Amamas Long Litimapim Nem Bilong God’!”
[Kredit Lain]
Mountain High Maps® Copyright © 1995 Digital Wisdom, Inc.