Ripot Long Wok Bilong Kingdom
‘God i Opim Rot Pinis na Yumi Gat Bikpela Wok’ Long Kuba
APOSEL Pol em wanpela man i bin mekim bikpela wok tru long autim gutnius bilong Kingdom bilong God. Em i bin painim kain kain rot bilong tokim ol man long ol tok promis bilong God long givim laip i stap oltaim long ol man i bihainim tok bilong em. Taim Pol i go long Efesus, em i lukim olsem i gat nupela rot i op na bai em inap helpim planti manmeri moa. Em i tok: “Mi laik i stap hia long taun Efesus . . . long wanem, God i opim rot pinis long mi, na mi gat bikpela wok bilong helpim planti manmeri.”—1 Korin 16:8, 9.
Ol Witnes Bilong Jehova long Kuba ol tu i lukim olsem nupela rot i op long ol. Tru, gavman i no givim tok orait yet long ol Witnes i ken rejista long gavman, tasol nau ol inap autim tok long ol wankantri bilong ol long ples klia. Nau gavman bilong Kuba i tingting strong long larim lain bilong sampela lotu i stap fri long mekim wok lotu bilong ol. Presiden Castro i bin tokaut olsem nau ol Witnes Bilong Jehova em wanpela lain bilong lotu em gavman bilong Kuba i save wok gut wantaim ol.
Dispela nupela pasin i kamap em i opim rot long ol Witnes inap mekim bikpela wok. Olsem: Nau ol Witnes i opim wanpela nupela ofis long Kuba, na dispela i helpim ol long stretim wok bilong ol long autim tok long dispela kantri. Winim 65,000 Witnes i helpim ol man long stadi na kisim gut ol tok bilong Baibel. Ol i mekim long rot bilong ol nius i kamapim ol tok bilong Baibel, olsem Wastaua na Kirap! Planti Kuba i laikim stretpela pasin, ol i kisim gutpela helpim taim ol i stadi long Baibel wantaim ol Witnes Bilong Jehova.
Na ol Witnes i save bung long ol liklik grup na mekim miting bilong ol long olgeta hap bilong dispela ailan. Na sampela taim ol inap mekim ol kibung i gat olsem 150 manmeri i bung. Ol i tenkyu tru long gavman bilong Kuba i larim ol i mekim olsem, long wanem, dispela i givim rot long ol na ol inap bung wantaim ol brata sista bilong ol, na mekim singsing bilong litimapim nem bilong God, na beten wantaim.
I no longtaim i go pinis ol i bin mekim “Pret Long God” Kibung Distrik inap olsem 1,000 taim insait long 3-pela wik tasol. Wanpela ripot i tok, long olgeta kibung ol i lukim olsem “ol samting i wok stret, na ol i bihainim lo, na ol i stap bel isi wantaim.” Ol lain bilong gavman i tok amamas long ol Witnes long dispela samting.
Long olgeta hap bilong graun ol Kristen tru i wok strong long inapim wok God i bin tokim ol long mekim, olsem autim gutnius bilong Kingdom bilong God. Na tu, ol i wok strong long i stap isi wantaim gavman. (Taitus 3:1) Ol Witnes Bilong Jehova i bihainim tok bilong aposel Pol, em i tok: “Namba wan samting yu mas mekim, em i olsem. Yu mas tokim ol manmeri long mekim ol prea na beten long God na tenkyu long em na askim em long helpim olgeta manmeri. Na ol i mas askim em tu long helpim ol king na olgeta gavman. Olsem bai yumi olgeta i ken sindaun gut na i stap bel isi, na yumi ken bihainim tru olgeta pasin God i laikim.”—1 Timoti 2:1, 2.