Wanpela Nius i Save Kirapim Bel Bilong Man
LONG olgeta hap bilong graun, ol i save wokim planti planti nius bilong inapim laik bilong ol man i hangre long kisim save o long kisim amamas.
Wanem samting i mekim na nius yu holim i narapela kain nius tru? Dispela pas brens-ofis bilong Sosaiti Was Taua long Jemani i bin kisim, em inap bekim dispela askim:
“Tenkyu tru, ol gutpela brata, long wok yupela i mekim. Taim mi na tupela pikinini man bilong mi i kam bek long haus bihain long miting, maski em 9:30 long nait, mi mas harim kaset bilong nupela Wastaua. Taim mi wasim ol plet samting, mi kirap long harim kaset bilong namba wan stori bilong stadi (Epril 1, 1995). Mi bin pilim olsem mi mas harim gen, olsem na mi lusim wok bilong mi long haus kuk na mi kaunim stori [“Yu Wanpela Gutpela Samting Tru Long Ai Bilong God!”] long Wastaua bilong mi taim mi harim kaset gen. Stori i kirapim tru bel bilong mi na mi pilim tru tok bilong paragraf 4 na 5. Inap sotpela taim aiwara i kamap. Mi amamas tru Jehova i larim mi long i stap laip, na mi stap insait long lain bilong em, na mi inap wok wantaim planti manmeri moa, bilong kamapim nem bilong em. Tru tumas, i no gat as na yumi ken ting yumi no inap mekim wanpela gutpela samting. Spirit bilong Jehova i stap wantaim lain bilong em. Yumi olgeta i mas i stap wanbel long karim ol hevi na sanap strong long bilip. Mi salim sori Kristen; sista wanbilip bilong yupela.”
Nius Wastaua i save mekim gutpela wok moa. Em i save kirapim tru bel bilong ol man i save kaunim, na inapim laik bilong ol long ol samting bilong spirit, na long taim stret em i givim tok bilong strongim ol. Tru tumas, nius Wastaua i save givim ‘kaikai long taim stret.’—Matyu 24:45.