Mekim Gut Bel Bilong Ol Insait Long Fopela Yia Bilong Pait
INSAIT long 4-pela yia bilong pait long hap bipo ol i kolim Yugoslavia, taim nogut i painim ol man na ol i sot tru long kaikai samting. Ol dispela hevi i bin painim planti handet Witnes Bilong Jehova tu, em ol i wok yet long lotuim dispela “God bilong mekim isi bel bilong olgeta man i gat hevi.”—2 Korin 1:3.
Long Sarayevo, ol man i gat narapela hevi gen antap long ol dispela hevi—ol i sindaun long wanpela bikpela taun em ol birua i bin banisim long taim bilong pait. Ol i sot long paua, wara, paiawut, kaikai. Long dispela taim nogut i bin painim ol, Kongrigesen Sarayevo bilong ol Witnes Bilong Jehova i wok yet olsem wanem? Ol Kristen long ol narapela kantri i stap klostu, ol i kisim planti kaikai na ol narapela samting i kam, maski bagarap inap painim ol. (Lukim Wastaua, Novemba 1, 1994, pes 23-27.) Na tu, ol brata long Sarayevo i tilim hap kaikai samting bilong ol i go long narapela narapela, na namba wan samting ol i tingim, em bilong tilim ol samting bilong spirit i go long ol narapela. Taim ol birua i kam banisim Sarayevo, wanpela wasman Kristen i stap long dispela taun em i ripot olsem:
“Ol miting i bikpela samting tru long mipela. Mitupela meri bilong mi wantaim 30 manmeri moa, mipela i save wokabaut inap 15 kilomita bilong go long miting, na 15 kilomita [9-pela mail] bilong go bek. Sampela taim gavman i putim toksave long ol bai givim wara long mipela long taim i gat miting. Orait, ol brata bai mekim wanem? Bai ol i stap long haus o go long miting? Ol brata bilong yumi ol i laik i go long miting. Oltaim narapela i save helpim narapela; ol liklik kaikai samting ol i holim, ol i save tilim hap i go long ol narapela. Wanpela sista long kongrigesen bilong mipela em i save sindaun long arere bilong taun klostu long bus, olsem na i no hatwok tumas long em i painim paiawut. Na em i save wok long wanpela haus bret, na ol i baim em long plaua tasol. Taim em i gat rot, em i save wokim wanpela bikpela bret na karim i go long miting. Orait taim miting i pinis na ol i laik go ausait, em i save givim liklik hap bret long olgeta wan wan.
“Em i bikpela samting long ol brata o sista i no ken ting ol narapela i lusim ol. Mipela i no save husat bai painim sampela hevi na ol narapela i mas helpim em. Wanpela taim ais i karamapim ol rot na wanpela sista i gat sik, na ol yangpela strongpela brata ol i putim em long wanpela kain karis na ol i pulim em i go long miting.
“Mipela olgeta i save mekim wok bilong autim tok, na Jehova i blesim wok bilong mipela. Em i lukim pinis bikpela hevi bilong mipela long Bosnia, em mipela i sot tru long ol samting, tasol em i bin mekim gut long mipela na lain bilong mipela i go bikpela—tasol taim dispela pait i no kamap yet, lain bilong mipela i no go bikpela olsem.”
Na i olsem tu long ol narapela hap bilong dispela kantri bipo ol i kolim Yugoslavia—lain bilong ol Witnes Bilong Jehova i wok long i go bikpela, maski taim nogut tru i painim ol. Ofis bilong ol Witnes Bilong Jehova long Kroesia i kamapim ripot bilong wanpela grup bilong ol Witnes, na ripot i tok: “Taim nogut tru i painim ol brata i stap long Velika Kladusa. Sampela taim ol birua i kam pait long taun. Ol brata i mas toksave long ami bilong ol Kroesia, na Serbia, na ol ami bilong ol Muslim, olsem ol i no insait long ol pait bilong dispela graun. Tru tumas, ol i karim planti hevi—ol i kalabus, ol man i paitim ol nogut, ol i hangre, klostu ol i kisim bagarap. Tasol olgeta i stap gut long Jehova na wanpela gutpela samting tru i kamap long ol—ol i lukim olsem Jehova i blesim tru wok bilong ol.”
Maski dispela taim nogut i painim ol Witnes Bilong Jehova long Velika Kladusa na wanpela taun klostu, em Bihak, ol i wok strong long autim gutpela tok bilong God i save mekim gut bel bilong ol man, na lain bilong ol i wok long i go bikpela. Inap 26 pablisa bilong Kingdom long dispela tupela taun ol i save mekim 39 Baibel-stadi wantaim ol man!