“Wanpela Gutpela Presen Tru i Kam Long Jehova”

WASTAUA bilong Me 1, 1996, i bin stori gut long pasin bilong ol Kristen olsem ol i no insait long ol pasin bilong dispela graun na olsem wanem ol i ken kisim stretpela tingting long wok ol i mas mekim bilong Jehova na “Sisar.” (Matyu 22:21) Planti man i bin kamapim amamas bilong ol long dispela nupela save ol i bin kisim. Wanpela pas bilong ol, em dispela pas wanpela Witnes long Grik i bin raitim i go long Lain Bilong Bosim Ol Witnes Bilong Jehova:

“Mi laik kamapim amamas bilong mi long yupela ol gutpela brata i save lukautim gut mipela long ol samting bilong spirit. Inap nainpela yia mi bin i stap long kalabus, long wanem, mi bihainim ol bilip Kristen, olsem na mi bin amamas tru long ol gutpela tok long Wastaua bilong Me 1, 1996. (Aisaia 2:⁠4) Dispela em i wanpela gutpela presen tru i kam long Jehova.​—⁠Jems 1:⁠17.

“Taim mi kaunim ol dispela stori, mi bin tingim wanpela tok long wanpela Wastaua bilong bipo (Ogas 1, 1994, pes 14): ‘Pasin bilong isi long ol man em i wanpela gutpela pasin tru na i save kirapim yumi long laikim moa yet Jehova.’ Yes ol brata, mi tok tenkyu long Jehova olsem mi bilong dispela gutpela oganaisesen bilong em, em dispela oganaisesen i save kamapim klia gutpela tingting na save bilong em.​—⁠Jems 3:​17.

“Mipela hia long kantri Grik i bin amamas tru long kisim ol nupela save i stap long Wastaua bilong Me 1, na ol brata sista i bin stap long kalabus inap sampela yia o ol dispela i stap yet long kalabus long wanem ol i holimpas bilip, ol i amamas moa yet long kisim. Mi laik tok tenkyu gen. Jehova i ken strongim yupela long spirit bilong em long wok yet long givim mipela ol gutpela kaikai bilong spirit bilong helpim mipela nau long dispela taim bilong hevi.”