Ol Dokta i Mas Kisim Tok Orait Long Sikman
LONG yia i go pinis, Jas bilong Haus Kot Bilong Mesina (Preliminary Investigations of the Court of Messina), Itali, i kamapim gen olsem ol dokta i mas daun long laik bilong sikman i bikpela pinis. Kot i pasim dispela tok taim ol i mekim kot bilong wanpela Witnes Bilong Jehova.
Long Janueri 1994, kwiktaim ol i kisim Antonino Stellario Lentini, em wanpela Witnes i gat 64 krismas na em i gat sik hemofilia, i go long wanpela haus sik long Taurmina, Mesina. Meri bilong Antonino, em Catena, i tokim ol lain bilong haus sik olsem ol i Witnes Bilong Jehova, olsem na em wantaim man bilong em ol i no ken orait long kisim blut. (Aposel 15:20, 28, 29) Ol dokta i daun long dispela laik bilong ol.
Tasol taim ol i kisim Antonino i go long narapela haus sik, wetlewa bilong em i no wok na em i no inap pulim win, na taim em i kamap long haus sik, klostu em i bagarap olgeta. Liklik taim bihain, em i dai. Bel bilong Catena i bagarap stret, tasol tok promis bilong Baibel long man i dai pinis bai kirap bek em i mekim gut bel bilong em. (Aposel 24:15) Tasol nau wanpela samting i kamap na em i kirap nogut tru long en; ating sampela tok giaman ol nius i kamapim i bin paulim ol jas na ol i sutim tok long Catena olsem em i gat asua bilong kilim man bilong em i dai, long wanem, em i no bin orait long ol dokta i katim man bilong em, maski ol dokta i ting ol i mas mekim bambai em i no ken bagarap.
Wanpela yia samting i lus, na long Julai 11, 1995, kot i tok Catena i no gat asua. Ol dokta i gat bikpela save ol i bin tokim kot, sapos ol dokta i bin katim dispela sikman, bai dispela i no inap helpim em, long wanem, em i bagarap tumas.
Tasol tok bilong jas i kamapim as tru na kot i tok Catena i no gat asua. Jas i tok, kot i hatwok tru long orait long ol dokta i mas givim marasin samting long sikman sapos sikman o mausman bilong sikman i sakim. Na em i tok, lo bilong ol dokta long Itali, em ol dokta i mas bihainim, i tok olsem “sapos dokta i laik mekim wanpela samting long sikman em sikman o mausman bilong em i no orait long en, orait, dokta i no ken mekim dispela samting.” Olsem na em i tok, ‘i stret Catena i pasim ol dokta long givim blut long man bilong em.’
Dispela tok bilong kot i kamapim gen olsem man i bikpela pinis i stret em i ken sakim ol marasin bilong dokta sapos em i no orait long kisim.