‘Ol i Laik Tru Long Helpim Ol Narapela’
EM TOK wanpela plisman bilong Nu Yok Siti i bin mekim long ol Witnes Bilong Jehova. Em i toktok wantaim Kathleen, em wanpela meri i wok oltaim long nambawan ofis bilong ol Witnes Bilong Jehova long Bruklin, Nu Yok.
Long wanpela gutpela de long mun Septemba samting, Kathleen i sindaun long wanpela fom long ples bilong wokabaut na em i kisim malolo long belo. Em i wok long harim kaset long wanpela kain redio i gat liklik spika em i putim long yau. Long hapsait long Wara Is long wanpela ples balus bilong helikopta ol man i redi na stretim ol samting bilong pop i ken lusim taun, em i bin kam lukim biktaun Nu Yok. Ol i was strong long olgeta hap, na sampela plisman i raun na was long dispela ples bilong wokabaut na kisim malolo. Wanpela plisman i kam long Kathleen na askim em long em i mekim wanem. Kathleen i tok: “Mi harim wanpela kaset long tok ples Rasia. Mi wanpela Witnes Bilong Jehova, na mi laik lain long tok ples Rasia bambai mi ken autim gutnius bilong Kingdom bilong God long ol man i save tok Rasia, em ol i kam i stap long dispela biktaun.”
Nau plisman i tok, inap olsem 15-pela yia em i mekim wok olsem plisman long Nu Yok Siti na insait long dispela taim isi isi em i kisim save long ol Witnes Bilong Jehova na nau em i amamas tru long ol. Em i tok: “Mi ting ol Witnes Bilong Jehova i wanpela lotu i stretim gut ol wok na lain bilong ol i gat bikpela laik tru long helpim ol narapela long hap ol i stap long en.”
Ol man long olgeta hap bilong graun i save long ol Witnes Bilong Jehova, long wanem, ol i autim tok long haus bilong ol man. (Aposel 20:20) Ol i tok Kingdom bilong God tasol em rot bilong stretim ol hevi i painim ol man, na tu, ol i kirapim ol manmeri long bihainim ol tok bilong Baibel long olgeta de, na dispela bai helpim ol long sindaun gut na stap amamas. Olsem: Ol Witnes i kirapim ol papamama long sindaun gut wantaim ol pikinini bambai haus i ken stap olsem gutpela ples bilong lainim ol samting. Ol i kirapim ol man long bihainim stretpela pasin na bihainim ol lo, na lainim ol wok na ol gutpela pasin em bos bilong ol bai amamas long en.
Tru tumas, ol Witnes Bilong Jehova i gat bikpela laik tru long helpim ol man long hap bilong ol long sindaun gut. Mipela i laik kirapim yu long bihainim tok i stap daunbilo.