“Haus Lotu Bilong Yupela i Stap We?”

PLANTI taim long Mosambik ol i kamapim dispela askim long ol Witnes Bilong Jehova. Bipo i hatwok long bekim dispela askim, long wanem, i kam inap long 1991, gavman i no bin orait long ol Witnes Bilong Jehova long dispela kantri. Olsem na pastaim ol i no gat wanpela haus tru i gat toksave i stap bilong makim olsem em i ples ol i bung long en na mekim lotu.

Tasol dispela samting i senis long Februeri 19, 1994. Long dispela de i gat bikpela san, ol i dediketim tupela Haus Kingdom, em namba wan taim ol i bin wokim Haus Kingdom long Mosambik. Inap 602 manmeri i bin kam na harim tok bilong dediketim dispela tupela ples miting long biktaun Beira i stap long nambis bilong Mosambik. Tripela kongrigesen long dispela taun bai mekim wok long dispela tupela haus.

Kirap long taim ol i putim simen i go inap long taim ol i wokim pinis tupela haus, ol i bin wok strong tru inap wanpela yia na tupela mun. Planti taim inap olsem 30 volantia bilong kantri Simbabwe ol i bin kam wok wantaim ol Witnes bilong Beira. Haus misineri long Beira, em olsem hetkwota bilong mekim dispela wok, i no bikpela inap long olgeta dispela volantia i ken slip long en, olsem na long ol Sarere Sande sampela i bin slip long ol haus sel samting ol i bin sanapim insait long banis bilong haus misineri, na sampela taim ol i bin mekim olsem i go inap sampela wik.

Hap graun em Haus Kingdom bilong Kongrigesen Masamba na Kongrigesen Munhava i sanap long en, em i stap long bikrot bilong Beira. Wanpela misineri i tok: “Taim ol i wok hariap na ol man inap lukim ol samting i kamap hariap, mipela i lukim sampela ka em klostu ol i laik bam; ating ol draiva i lukluk i go long Haus Kingdom na ol i no lukluk gut long ol i draiv we.” Planti ol i pasim ka bilong ol na lukim ol Witnes i mekim wok, na ol i kirap nogut long lukim ol man bilong narapela narapela lain ol i wok gut wantaim olsem wanpela lain.

Ol i bin mekim bikpela wok bilong tingim na stretim gut dispela wok. Long dispela hap bilong graun, simen na ain samting i save sot na planti kampani i mas lusim wok ol i laik mekim, tasol i no gat wanpela taim na ol Witnes i bin lusim wok ol i mekim long tupela Haus Kingdom. Wanpela taim ol i mas i gat 800 bek simen, tasol ol i no inap kisim, long wanem, dispela wanpela ples tasol i gat simen em i sot long ol bek bilong pulapim simen long en. Ol brata i salim tok i go long brens-ofis bilong Sosaiti Was Taua long nambawan biktaun, Maputo; Sosaiti i kisim ol bek na putim long balus i go long faktori simen, na faktori i pulimapim simen long ol dispela bek. Olsem na ol inap wok i go.

Narapela taim ol i wok long putim ol sparen, na ol sparen ain i pinis. I no gat ol sparen ain long dispela hap, olsem na ol i bin kisim i kam longwe inap 600 kilomita! Wanpela man i sanap lukluk i stap na wanpela wokman i go askim em, ol inap kisim we sampela ain bilong ol i ken pinisim dispela wok. Man i bekim tok olsem: “Mi bin sanap hia winim wanpela aua pinis, na i olsem i gat as na mi bin mekim olsem. Mi laikim tru dispela wok yupela i mekim na pasin yupela i save kamapim long mekim wok. Mi gat dispela kain ain yu laikim na mi bai amamas long givim long yupela olsem presen.” Dispela gutpela samting bilong helpim ol i bin kamap stret long taim bilong en.

Planti man i lukim dispela wok ol i mekim na ol i laik save wanem bikpela konstraksen-kampani i bosim. Ol wokman i amamas long tokaut olsem ol i Witnes Bilong Jehova na ol i mekim wok volantia. Ol dispela man i pilim tru wanem samting? Wanpela i tok, “Yupela i stap wanbel tru. Maski yupela i bilong ol narapela narapela lain, yupela i wok gut wantaim olsem brata brata tru.” Dispela i mekim na planti man i kam na tok ol i laik stadi long Baibel. Na tu, dispela i bin kirapim planti man long kam long ol miting. Olsem: Ol lain i kam long ol miting bilong Kongrigesen Manga, ol i winim ol Witnes inap tupela taim.

Ol dispela nupela Haus Kingdom i olsem wanpela gutpela blesing ol Witnes long dispela hap ol i kisim. Pastaim ol i bin bung long ol ples nating i gat rup kunai o sampela hap kapa tasol, o ol i bin bung insait long banis bilong wanpela man o insait long wanpela liklik rum long haus bilong wanpela man. Planti taim ren i wasim ol, tasol ol i wok yet long kam long ol miting. Inap planti yia pinis ol dispela ples i olsem Haus Kingdom bilong ol​—⁠ol Witnes long Mosambik ol i no save long sampela narapela kain Haus Kingdom. Brata Caetano Gabriel, wanpela elda long Kongrigesen Masamba, i tok: “Mipela tenkyu tru long ol brata bilong mipela long olgeta hap bilong graun i bin givim mani bilong helpim mipela long wokim dispela haus.” Wanpela yangpela Witnes i tok: “Taim mipela i stap long Kariko (olsem “ol banis bilong skulim gen ol man” em ol Witnes Bilong Jehova i bin kalabus long en inap 12-pela yia), mipela i save tok, ‘Mipela bai wok long stap gut long Jehova, na Jehova bai givim gutpela pe long mipela.’ Nupela Haus Kingdom em i wanpela gutpela pe i kam long Jehova.” Ol dispela tok i kamapim bikpela tenkyu bilong ol na i makim olsem ol i gat strongpela tingting long litimapim nem bilong Jehova.

Planti yangpela, taim ol i insait long dispela wok konstraksen, bel bilong ol i kirap tru long mekim wok painia, na bihain ol i kamap painia oltaim. Yangpela Isabel em wanpela painia oltaim long Kongrigesen Manga, na taim em i lukim Haus Kingdom long de paslain long ol i dediketim, na i stap klin tru, em i tok: “Mi ting dispela em i nambawan naispela ples tru long taun Beira. Mi amamas tru long stap long dispela ples.” Adão Costa, em wanpela misineri, em i tok ol bikman bilong taun ol i bin helpim gut ol Witnes long kisim sampela samting i kam long ol narapela kantri, long wanem, ol i save ol Witnes ol i man bilong bihainim stretpela pasin. Na em i tok moa: “Tru, sampela taim skin bilong mipela i bin les tru, tasol mipela i amamas long lukim planti gutpela samting i kamap long dispela wok na i bilong givim biknem long Jehova.”

Long nau, taim wanpela man bilong taun Beira i mekim pasin pren na askim mipela, “Haus lotu bilong yupela i stap we?,” ol Witnes i save stiaim em i go long wanpela bilong dispela tupela nupela Haus Kingdom na ol i amamas long tokim em: “Em i stap long Intenesenel Rot, Avenida Akordo de Lusaka, long hapsait bilong Namba Foa Lain Polis-Tesin.” Tasol ol i laik stretim tok bilong em, na ol i tok, “Mipela i no save kolim haus lotu. Em i wanpela Haus Kingdom!”

[Mep/Piksa long pes 20]

AFRIKA

Mosambik

Beira

Maputo

[Kredit Lain]

Mep: Mountain High Maps® Copyright © 1995 Digital Wisdom, Inc.