Ripot Long Wok Bilong Kingdom

Ol Yangpela i Litimapim Nem Bilong God Long Ripablik Demokratik Bilong Kongo

SAMPELA handet yia bipo, man bilong raitim Song i singautim ol yangpela long insait wantaim em long litimapim nem bilong King bilong oltaim: “Ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela! . . . Biknem bilong en i antap tru, i winim heven na graun.” (Song 148:​12, 13) Ol stori i stap daunbilo i kam long Ripablik Demokratik Bilong Kongo i kamapim dispela gutpela wok bilong litimapim nem bilong God.

• Papa bilong wanpela haus em wanpela painia salim i sindaun long en i pilim tru gutpela pasin ol Witnes Bilong Jehova i save mekim. Olsem na em i larim ol Witnes i stadi long Baibel wantaim Fifi, em pikinini meri bilong em i gat 5-pela krismas. Em i lukim Fifi i wok long kamap gutpela taim em i stadi long Baibel Stori Buk Bilong Mi,a olsem na em i orait long Fifi i go long ol miting long Haus Kingdom. Long Haus Kingdom liklik Fifi i lainim ol singsing bilong Kingdom long buk singsing bilong ol Witnes. Em i save laikim tru singsing namba 4, i gat het-tok olsem “God i Tok Promis long Kamapim Paradais.”

Wanpela taim papa bilong Fifi i kisim em i go long lotu bilong em. Olgeta i kirap nogut long lukim Fifi i no laik mekim ol singsing bilong lotu. Bilong wanem em i no laik singsing? Long wanem, em i pilim olsem ol singsing ol i mekim long lotu bilong papa bilong em i no stret wantaim ol samting em i lainim long stadi bilong em long Baibel. Em i no pret​—⁠em i kirap mekim dispela singsing bilong Kingdom em i save laikim.

Ol i traim traim long senisim tingting bilong em tasol ol i no inap, olsem na ol bikman bilong lotu i kirap rausim liklik Fifi long lotu! Maski ol i mekim nogut long Fifi, papa bilong em i stap isi. Em i amamas olsem Fifi i bin holimpas ol samting em i bilip long en. Papa na mama bilong Fifi i laik bai em i mas bung yet wantaim ol Witnes Bilong Jehova.

• Taim wanpela manki, nem bilong em Lukodi, i laik stadi long Baibel wantaim ol Witnes Bilong Jehova, papa bilong em i birua long em. Wanpela taim Lukodi i wok long redi long i go long miting long Haus Kingdom, na papa bilong em i laik katim em long bikpela naip. Na long narapela taim papa bilong Lukodi i paitim em long hap diwai, na em i katim bikpela hap skin bilong Lukodi long baksait. Maski papa bilong em i birua nogut tru long em, Lukodi i holimpas yet tingting bilong em long kamap wanpela Witnes Bilong Jehova. Em i wok long kamap strong na em i kisim baptais. Long nau em i mekim wok painia oltaim.

Liklik susa bilong Lukodi, em Sona, em i pilim tru pasin bilong brata bilong em long sanap strong, na em tu i kirap long stadi long Baibel wantaim ol Witnes Bilong Jehova. Papa bilong ol i laik pasim em long stadi, olsem na em i salim Sona i go skul long narapela ples, i no gat ol Witnes long en. Tasol dispela i no pasim Sona; em i wok long toktok wantaim ol narapela long ol samting em i bin lainim. Em i mekim olsem, na kasen sista bilong em tu i gat laik long stadi.

Taim ol Witnes long narapela ples klostu i harim stori bilong wok Sona i mekim bilong autim tok, ol i kam lukim em na stretim rot bilong stadi long Baibel wantaim em long olgeta wik. Em i wok long kamap strong, na i no longtaim na em i dediket na kisim baptais na kamap wanpela Witnes Bilong Jehova olsem brata bilong em i bin mekim. Na tu, long nau kasen sista bilong em i wanpela pablisa i no baptais yet, na ol i save mekim wanpela Buk-Stadi long dispela ples.

Em gutpela samting tru na i save strongim yumi taim ol yangpela i insait wantaim yumi long litimapim nem bilong Jehova!

[Futnot]