Yu Tingim Yet?
Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:
◻ Wanem nambawan wok bilong skul long wanpela yangpela Kristen?
Bikpela wok bilong skul em bilong inapim ol yangpela long kamap wanpela wokman bilong Jehova i mekim gut wok bilong em. Na nambawan bikpela skul ol inap kisim em skul bilong ol samting bilong spirit.—8/15, pes 21.
◻ Wanem sampela as na yumi mas kamapim bikpela rong bilong wanpela Kristen brata o sista long ol elda?
Wanpela as na yumi mas kamapim bikpela rong bilong em, em i olsem: Dispela i save lukautim kongrigesen na bai em i ken i stap klin. Narapela as em i olsem: Dispela em i wanpela pasin sori Kristen yumi mekim long God, na long kongrigesen, na long dispela man i bin mekim rong.—8/15, pes 28, 30.
◻ Wanem insait bilong dispela tok, ‘tingim gut de bilong Jehova i kamap’? (2 Pita 3:12)
Insait bilong en i olsem yumi no tingim dispela “de bilong Jehova” i stap longwe yet. Yumi no ken lusim tingting olsem dispela de bilong Jehova long pinisim pasin nogut bilong dispela graun em i kam klostu pinis. Dispela de i mas i stap olsem samting tru tru long ai bilong yumi, olsem samting i kam klostu pinis. (Sefanaia 1:7, 14)—9/1, pes 19.
◻ Bilong wanem taim bilong las de i no pinis kwiktaim olsem planti man i ting?
Jehova i save tingim wanem samting i gutpela bilong helpim olgeta manmeri. Em i laik bai ol i stap laip. (Esekiel 33:11) Yumi ken bilip tru olsem pinis bai kamap long taim stret bilong kamapim laik bilong gutpela Man bilong wokim yumi, em i gat olgeta save.—9/1, pes 22.
◻ Ol brata sista i mekim wok bilong God long olgeta de, olsem wanem ol inap i stap amamas maski ol hevi i painim ol?
Ol i mas tingim planti blesing ol i bin kisim, na ol i mas tingim ol narapela—inap planti planti tausen—em ol i save karim ol bikpela hevi long sindaun bilong ol, winim ol yet. (1 Pita 5:6-9)—9/15, pes 24.
◻ Wiliam Tindel i gat wanem laik na dispela i kirapim em long tanim tok bilong Baibel?
Tindel i laik bai ol tok bilong Baibel i stret na i klia tru, inap long ol man nating i ken kaunim na kisim gut.—9/15, pes 27.
◻ Olsem wanem yumi inap kamapim klia olsem yumi stap gut long helpim Tok Bilong God?
Yumi kamapim klia olsem yumi stap gut long Tok Bilong God taim yumi wok strong long autim tok bilong en long ol narapela man. Na taim yumi mekim wok tisa, bai yumi was gut long wok yumi mekim long Baibel, nogut yumi paulim o senisim sampela tok bilong en bilong helpim ol tingting bilong yumi yet. (2 Timoti 2:15)—10/1, pes 20.
◻ Olsem wanem ol tingting nogut bilong dispela graun inap mekim na yumi no stap gut moa long God?
Ol tingting nogut bilong dispela graun inap mekim na yumi no amamas moa long ol samting yumi holim, na yumi tingting tumas long ol samting yumi laik kisim na yumi putim i go pas long laik bilong God na long dispela rot yumi no stap gut moa long God. (Skelim wantaim Matyu 16:21-23.)—10/1, pes 29.
◻ Wanem insait bilong dispela tok, givim bel olgeta long mekim wok bilong Jehova?
Taim yumi givim bel olgeta long mekim wok bilong Jehova, i olsem yumi mekim dispela wok long olgeta save na strong bilong yumi, na yumi mekim inap tru long mak yumi inap winim. (Mak 12:29, 30)—10/15, pes 13.
◻ Wanem samting i bikpela samting bambai yumi ken stap olsem man i larim ol lo bilong God i stiaim em?
Bikpela samting em olsem, yumi mas save long Jehova, na ol samting em i laikim, na ol samting em i no laikim, na ol samting em i laik mekim bilong kamapim laik bilong em. Taim ol dispela tok i tru long ol samting bilong God i bosim i stap bilong yumi, ol i kamap olsem ol lo i gat laip. (Jeremaia 22:16; Hibru 4:12)—10/15, pes 29.
◻ Ol wokboi bilong Jehova i gat wanem stretpela tingting long ol gavman bilong graun?
Ol i no insait long ol samting bilong politik, long wanem, ol i mekim wok olsem mausman bilong Kingdom bilong God. (2 Korin 5:20) Tasol ol i save bihainim maus bilong bel na daun long ol man i gat namba long bosim ol.—11/1, pes 17.
◻ Pasin profet Elisa i bin bihainim em inap skulim yumi long wanem samting?
Taim Elaija i singautim Elisa long mekim wanpela bikpela wok wantaim em, kwiktaim Elisa i lusim gaden bilong em na i kamap wokboi bilong Elaija, maski sampela wok bilong em i olsem pipia wok. (2 King 3:11, NW) Sampela wokboi bilong God long nau i bihainim wankain pasin olsem bilong daunim laik bilong ol yet na ol i lusim wok bilong ol na ol i autim gutnius long ol narapela hap.—11/1, pes 31.
◻ Pas bilong Jems i gat wanem ol gutpela tok bilong helpim na stretim yumi?
Em i soim yumi long olsem wanem yumi inap karim ol hevi i save painim yumi, na em i tok yumi no ken mekim gut long sampela tasol na sampela nogat, na em i laik kirapim yumi long mekim ol stretpela wok. Jems i tok strong long yumi mas bosim maus, na sakim ol pasin bilong dispela graun, na wok strong long kamapim bel isi namel long ol brata. Na tok bilong em i mas kirapim yumi long i stap isi na karim hevi na tingting oltaim long beten.—11/15, pes 24.
◻ Bilong wanem Jehova i redi long lusim rong bilong man? (Song 86:5)
Jehova i redi long lusim rong bilong man, long wanem, em i no save lusim tingting olsem yumi bilong graun tasol, na yumi gat ol pasin kranki i stap long skin bilong yumi, em sin bilong yumi i kamapim. (Song 103:12-14)—12/1, pes 10, 11.
◻ Bilong wanem yumi mas laik long lusim rong bilong ol brata?
Sapos i gat as na yumi mas marimari long wanpela man i bin mekim rong long yumi, tasol yumi no laik lusim rong bilong em, dispela inap mekim na bai yumi yet i no stap pren moa bilong God. (Matyu 6:14, 15)—12/1, pes 17.