“Baibel Em i Raitim Long Wanpela Pinga”
BIKPELA sik i painim Joseph Schereschewsky na skin bilong em i dai. Dispela i mekim na em inap raitim ol samting long rot bilong taipraita tasol na mekim wok long wanpela pinga tasol. Maski olsem, em i pinisim wok em i laik mekim—em tanim tok bilong Baibel long tok Saina, em wanpela tok ples i hatwok tru long wanpela man bilong narapela kantri long save gut long en.
Schereschewsky i kamap insait long lain Juda na taim em i bikpela pinis em i skelim gut lotu Kristen na i kamap wanpela Kristen. Bihain em i kamap wanpela misineri long Saina. Long dispela hap, kirap long yia 1866 i go inap long yia 1900 samting, em i insait long wok bilong tanim tok bilong planti buk samting. Schereschewsky i bilong lain Juda, olsem na em i save gut long tok Hibru winim ol narapela saveman i wok wantaim em. Olsem na ol i givim wok long em long tanim tok bilong Ol Skripsa Hibru olgeta. Em i mekim dispela wok longpela taim liklik na klostu long pinis bilong wok bilong em, em i wokim tu wanpela buk Baibel olgeta long tok Saina wantaim ol tok olsem as bilong en.
Joseph Schereschewsky em i man bilong tanim tok bilong Baibel na em i givim bel tru long kamapim buk Baibel long ol tok ples bilong ol man. Tasol wok bilong em i hatwok tru. Wanpela buk (The Book of a Thousand Tongues) i tok olsem, samting em i bin mekim bilong helpim wok bilong kamapim buk Baibel long tok Saina i narakain tru “long wanem dispela buk i wanpela gutpela buk tru na Schereschewsky i wokim gut maski planti samting i wok long pasim em.”
Taim han bilong Schereschewsky i dai, em i mekim gut yet wok bilong em. Em i no inap mekim gut wok long tupela han bilong em, olsem na i hatwok tru long em i rait long taipraita. Olsem na em i kolim dispela buk Baibel em i tanim tok bilong en olsem Baibel em i raitim long wanpela pinga. Maski han bilong em i no gutpela, em i wok strong inap 25 yia na bai em inap wokim dispela Baibel. Em i strongim bel na i no les, olsem na em i insait long wok bilong helpim ol man long save long Tok Bilong God long tok Saina—em tok ples planti manmeri i save long en winim ol narapela tok ples.
[Piksa Kredit Lain long pes 11]
Tupela piksa ol i kisim long American Bible Society Archives