Yu Laik Bung Wantaim Ol?

NDJAUKUA ULIMBA i gat 73 krismas, na long yia i go pinis em i bin wokabaut long rot inap 450 kilomita. Inap 16 de em i wokabaut long dispela rot.

Dispela lapun man i wokabaut longwe olsem bambai em i ken i go long wanpela kibung bilong ol Witnes Bilong Jehova ol i save mekim long olgeta yia. Bihain long kibung em i amamas tru na em i kisim strong long ol samting bilong spirit na em i wokabaut gen i go bek long ples​—⁠em i wokabaut 16 de gen. Olsem wanem? Em i amamas long mekim olsem? Yes, em i amamas! Inap planti yia Ndjaukua Ulimba i bin wokabaut long dispela longwe rot long olgeta yia.

Dispela man Afrika i wanpela bilong 15 milion manmeri bilong 230 kantri em ol i bin kam long ol kibung bilong ol Witnes Bilong Jehova long yia i go pinis. Tru, planti bilong ol i no bin wokabaut inap planti de bilong i go long ples kibung. Ol i bin kisim ka, bas, tren, o balus bilong i kam. Olsem wanem? Yu wanpela bilong ol?

Long 1998 ol kibung bai kamap gen long olgeta hap bilong graun; planti bai kamap long ol mun i no gat planti ren. Sapos skin bilong em i strong yet, ating Ndjaukua Ulimba bai wokabaut gen long dispela longpela rot bilong i go long kibung. Em na planti milion moa bai harim ol gutpela tok bilong helpim ol na strongim bilip bilong ol. Long ol manmeri i bung, dispela kibung bai i bikpela samting long ol long dispela yia. Mipela i singautim yu tu long kam. Ol Witnes Bilong Jehova long hap bilong yu bai i amamas long tokim yu long ples em kibung bai kamap long en long hap bilong yu.