Husat i Bin Givim Save Long Ol Klaut?
“YUPELA i save lukim klaut i kamap long hap bilong san i go daun, na kwiktaim yupela i save tok, ‘Ren i laik i kam.’ Na tru tumas, ren i save kam. Na yupela i save lukim strongpela win bilong saut i kamap, na yupela i save tok, ‘Bai san i hat nau.’ Na tru tumas, hatpela san i save kamap.” Man bilong raitim Gutnius, em Luk, em i bin raitim dispela tok bilong Jisas, na em i kain tok ol i save mekim long Palestain long bipo taim ol i laik tokaut long bikpela win na ren bai kamap o san bai hat. (Luk 12:54, 55) Long sampela taim, ol man bilong bipo ol inap lukim mak bilong ol samting i laik kamap na ol i kolim stret dispela samting bai kamap.
Long nau, ol man bilong skelim ren, win na san samting ol i mekim wok long ol narapela kain samting olsem wanpela satelait i raunim graun, na kompyuta samting bambai ol inap save bai i gat ren, win o san samting bai kamap long sampela taim bihain. Tasol planti taim ol i save popaia long kolim ol samting bai kamap. Bilong wanem na i olsem?
I gat planti samting i mekim na i hatwok long kolim stret ol samting bai kamap, olsem win o ren samting. Olsem: Sampela senis olsem ples i hat o kol tumas o strong bilong win, na spit bilong win long hap win i go long en, ol dispela senis inap mekim na bai i hatwok long kolim stret ol dispela samting. Na tu, i gat sampela kain strong em san, klaut na solwara i save kamapim na ol saientis i no save gut yet long en. Long dispela as, maski ol i tok bai bikpela win, ren o san samting bai kamap, tasol sampela taim em i no save kamap tru.
Yumi ol man i gat liklik save tasol long skelim win, ren na san samting na dispela i mekim na yumi inap tingim wanpela askim God i bin mekim long Jop: “Olsem wanem? Ating ren na [kol] bilong nait i gat papa, a? Na husat i mama bilong ais na bilong ren ais i save pundaun long graun? . . . Ating yu inap bikmaus long ol klaut na ol i harim tok bilong yu na kapsaitim bikpela ren antap long yu, a? . . . Husat i gat save inap long kaunim olgeta klaut? Ol klaut i olsem sospen wara i stap long skai, na husat inap kapsaitim ol na mekim ren i pundaun?”—Jop 38:28-37.
Bekim bilong olgeta dispela askim i olsem: God Jehova tasol inap mekim olgeta dispela samting, na man, nogat. Tru, ol man i ting ol i gat save, tasol gutpela save na tingting bilong Man bilong wokim yumi i moa yet, na i bikpela tru. Tru tumas, em i mekim pasin sori na em i kamapim gutpela tingting na save bilong em long yumi long rot bilong Baibel, na dispela samting inap helpim yumi long wokabaut long stretpela rot.—Sindaun 5:1, 2.