Bai Yu Bihainim Toksave?

LONG Me 19, 1997, wanpela saiklon i kamap long taun Sitagong, long Banglades. Ol i kisim save olsem long taun Koks Basar, win i spit tru inap 250 kilomita long wanpela aua. Long ol ples long bus, ol haus kunai i no stap moa​—⁠ol mak tasol i stap long graun long ol hap ol haus i bin sanap long en bipo. Win i kamautim sampela diwai na pos bilong paua; na win i brukim sampela diwai na pos long 2-pela hap olsem ol i stik masis tasol. Wanpela het-tok long niuspepa Bhorar Kagoj i tok, dispela saiklon i kilim i dai 105 manmeri.

Lain bilong skelim win na ren samting ol i bin tokaut long dispela saiklon inap 36 aua paslain long em i kamap. Planti man i no bin kisim bagarap, long wanem, planti handet tausen ol i bin hait long ol strongpela haus simen.

Winim wan handet yia nau, ol Witnes Bilong Jehova i bin tokaut long wanpela bikpela bagarap bai kamap em i bikpela moa long ol saiklon. Baibel i kolim dispela bagarap olsem “de bilong Bikpela.” (Joel 2:​31) Taim yumi bihainim ol toksave i stap long Baibel, yumi inap abrusim belhat bilong em.​—Sefanaia 2:​2, 3.

Ol Witnes Bilong Jehova ol i no man bilong tokaut long samting nogut tasol bai kamap, nogat. Ol i autim tok long gutpela samting yumi inap wetim i kamap. Ol i laik helpim ol man long save long Kingdom bilong God, klostu nau em bai pinisim ol man nogut long graun. Tok Bilong God, em Baibel, i tokim yumi: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠Song 37:​10, 11.

[Piksa Kredit Lain long pes 32]

WHO/League of Red Cross