Ol Bikman i Litimapim Nem Bilong Ol Witnes

LONG Kadis, em wanpela taun long Spen i stap long nambis inap 500 kilomita long saut-wes bilong biktaun Madrit, bikmeri Doña Teófila Martínez i givim wanpela hap plang samting i gat toksave long en (piksa antap) i go long ol Witnes Bilong Jehova. Ol tok bilong en i tok: “Mipela ol lain bilong siti kaunsil i givim dispela i go long ol Witnes Bilong Jehova bilong kamapim olsem mipela i amamas tru long ol i wok wantaim mipela long mekim ol wok bilong lukautim biktaun.” Ol Witnes i bin mekim wanem na ol i kisim dispela tok bilong litimapim nem bilong ol?

Ol i tingim gutpela wok ol Witnes i mekim bilong stretim wanpela hap bilong stediam bilong kaunsil long biktaun na ol i givim dispela samting long ol. Inap sampela Sarere Sande, planti handet Witnes i bin kam bilong helpim wok bilong stretim gen plua bilong rum toilet daunbilo long stediam bilong pilai soka long Karansa. Ol dispela paip samting na plua ol brata i bin stretim i helpim olgeta lain i save mekim wok long dispela stediam.

Inap sampela yia nau, ol Witnes Bilong Jehova i gat gutnem namel long ol manmeri. Olgeta yia, siti kaunsil i save larim ol Witnes i mekim wok long Stediam Karansa bilong wokim kibung distrik bilong ol. Olsem na ol Witnes i amamas long mekim ol samting long helpim wok bilong stretim stediam na bai em i ken i stap gutpela.

Wan wan taim ol Witnes Bilong Jehova i mekim kain wok olsem, tasol long olgeta taim ol i save go lukim ol manmeri long biktaun bilong helpim ol long narapela rot. Ol i save autim “gutnius” bilong Kingdom bilong God. Ol i no save autim tok bambai ol manmeri i ken litimapim nem bilong ol. Ol i bihainim tok bilong Jisas long autim “gutnius bilong kingdom” na long “mekim olgeta lain manmeri i kamap disaipel.” (Matyu 24:14; 28:19) Long dispela rot ol Witnes Bilong Jehova i laik helpim ol manmeri bilong dispela hap taim ol i skulim ol long “bihainim stretpela pasin.”​—⁠Sindaun 12:⁠28.