Bel Isi Long Olgeta Hap—Husat Bai Kamapim?
OLSEM WANEM? Sapos ol i kamapim wanpela kain skul na wanpela lotu tasol long olgeta hap bilong graun, dispela bai kamapim bel isi? Dispela em tingting bilong Saveman Robert Muller, bipo em i bin stap nambatu bilong seketeri-jeneral bilong Yunaitet Nesen, na em i kisim prais UNESCO Prize for Peace Education long 1989. Olsem nius The Vancouver Sun i kamapim, Saveman Muller i “bilip strong olsem ol sumatin bilong olgeta hap i mas kisim skul long wanpela bikpela samting tasol, olsem ol samting bilong dispela graun bilong yumi, pasin na sindaun bilong man, na pasin bilong i stap isi wantaim ol narapela man.” Em i laik bai wanpela taim i kamap bihain na ol skul long olgeta hap i lainim ol sumatin olsem Yunaitet Nesen i gutpela rot bilong kamapim bel isi. Na nius i tok, em i ting “olgeta lotu bilong graun i mas kamap memba bilong wanpela oganaisesen i olsem Yunaitet Nesen, nem bilong en Yunaitet Lotu.” Orait nau “olgeta samting ol lotu i skulim ol man long en bai strongim pasin bilong i stap isi wantaim ol narapela lain.”
Olsem wanem? Pasin bilong i stap bel isi bai kamap tru tru long dispela graun? Yes, em bai kamap! Tasol i no long rot bilong ol man. Inap 2,700 yia i go pinis, spirit i stiaim wanpela man na em i helpim yumi long save long nambawan skul tru bilong skulim ol man long stap bel isi. Em i tok profet olsem, Jehova bai skulim ol man i gat gutpela bel na bai ol “i gat gutpela sindaun tru.”—Aisaia 54:13.
Baibel i tok, God tasol i save ‘givim bel isi long yumi.’ (Rom 16:20) Nau tu wanpela gutpela wok bilong skulim ol man long olgeta hap i wok long kamap taim Jehova i skulim ol manmeri bilong em long ‘kamap wanbel wantaim ol arapela manmeri, na strong long bihainim dispela pasin,’ na long “paitim ol bainat bilong ol i kamap olsem ol ain bilong brukim graun,” na “bai ol i no skul moa long pait.”—1 Pita 3:11; Aisaia 2:2-4.
Sapos tok i tru i as bilong wanpela lotu, na pasin bilong giaman i no stap insait long en, God i orait long dispela lotu na em i save blesim. (Matyu 15:7-9; Jon 4:23, 24) Lotu i tru i save bihainim olgeta tok bilong Baibel, em tasol inap helpim ol manmeri long i stap bel isi na wanbel na laikim tru ol narapela.—Jon 13:35.
Bilong kisim sampela save moa long ol tok Baibel i mekim long bel isi bai kamap long olgeta hap, mipela i laik bai yu ken askim ol lain bilong wokim dispela nius na ol bai helpim yu.