Laikim Tru Ol “Manmeri i Bilip Long Bikpela”
OL KRISTEN tru i pas gut wantaim olsem wanpela famili. Tru tumas, kirap long taim bilong ol aposel i kam inap nau, narapela i save kolim narapela olsem “brata” na “sista.” (Mak 3:31-35; Filemon 1, 2) Dispela tok i no tok nating tasol, nogat; em i makim pasin bilong ol man i lotu long God long tingim narapela. (Skelim wantaim 1 Jon 4:7, 8.) Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
Dispela kain pasin sori i kamap long ples klia long Julai 1997, long kantri Sili. Pastaim bikpela san i bin stap inap longpela taim, na bihain bikpela ren na tait wara i kamap. Wantu planti man i sot long kaikai, klos, na ol narapela samting. Long taim bilong ol bikpela bagarap, ol Witnes Bilong Jehova i wok strong long bihainim tok Pol i mekim long ol Galesia: “Olsem na wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”—Galesia 6:10.
Olsem na kwiktaim ol Witnes Bilong Jehova i stretim ol samting bilong helpim ol man. Ol i bungim na skelim kaikai na klos samting, na putim long ol bokis na salim i go long hap dispela bagarap i bin kamap long en. Ol pikinini i givim ol samting bilong pilai long en tu! Wanpela sista i kirap nogut taim em i lukim Haus Kingdom i pulap long kaikai samting. Em i tok: “Mi kirap nogut tru, na mi no save bai mi lap o bai mi krai. Mipela i sot tru long ol dispela samting mipela i kisim.”
Bihain, graun i guria long wanpela hap em tait wara i bin bagarapim. Planti haus i bagarap olgeta. Bilong helpim ol brata, ol i kamapim sampela komiti moa bilong helpim ol. Ol Komiti Bilong Wokim Ol Haus Kingdom—ol i save lukautim wok bilong sanapim ol ples bung bilong ol Witnes Bilong Jehova—ol tu i givim helpim long ol brata. Wanem samting i kamap? Ol brata i wokim ol liklik haus, na givim nating long ol brata em haus bilong ol i bagarap pinis. Tru, ol dispela haus i no gat ol gutpela bilas samting long en, tasol ol i winim tru ol haus em ol narapela lain bilong helpim ol man i wokim na ol man i ken kisim na ol i mas baim bihain. Ol dispela haus i no gat plua, na ol windo, na ol i no bin penim.
Sampela brata i kam long ol longwe hap bilong helpim ol brata. Siaman bilong wanpela Komiti Bilong Wokim Ol Haus Kingdom, em i raun inap tupela de long hap bagarap i kamap long en—maski em i sindaun long wilsia. Wanpela brata i aipas i wok strong tru, em i karim ol diwai i go long kamda bilong em i ken katim. Wanpela brata i yaupas i bungim ol dispela diwai na kisim i go long hap ol brata i gat wok long en.
Planti man i lukim wok bilong ol brata long helpim ol man na ol i pilim tru dispela samting. Long wanpela taun, ka bilong polis i stap klostu long haus bilong wanpela sista em ol brata i wok long stretim. Ol polis i laik lukim wanem samting i kamap. Wanpela polisman i askim wanpela brata: “Ol dispela wokman i amamas tru ol i husat, na yupela i baim ol long hamas?” Brata i tokim em olsem olgeta dispela man i mekim wok volantia. Wanpela polisman i tok, long olgta mun em i save givim namba 10 hap bilong mani em i save kisim long lotu bilong em, tasol pasto bilong em i no bin kam lukim em bihain long dispela guria! Long de bihain, wanpela polisman i ringim dispela sista. Em tu i bin lukim wok ol dispela wokman i mekim. Em i tok, em i pilim tru pasin bilong ol dispela wokman long givim bel long wok, na klostu em i laik i go na wok wantaim ol!
Tru tumas, wok bilong helpim ol brata long Sili em i wanpela wok ol volantia i bin amamas long mekim, na ol man i lukim dispela ol i kisim gutpela save long pasin bilong ol Witnes.