Ol i Kolim Nem Bilong God Long Israel

INAP planti handet yia, lotu Juda i tambuim ol lain bilong en long kolim nem bilong God, em Jehova. Olsem buk Misna i tok, man i kolim nem bilong God, em “i no inap i stap insait long nupela taim bihain.”​—⁠Sanhedrin 10:⁠1.a

Long Janueri 30, 1995, nambawan rabai bilong bipo, em i kolim nem bilong God. Em i kolim nem bilong God taim em i mekim wanpela kain beten bilong askim God long stretim bek ol samting. Ol i save mekim dispela beten bambai God i ken mekim ol samting long heven na graun i wok gut gen, em ol i ting ol spirit nogut i bin bagarapim. Nius Yedioth Aharonoth, bilong Februeri 6, 1995, i tok: “Dispela pasin bilong lotu i gat bikpela strong bilong en, olsem na ol tok bilong en i save stap long wanpela buklet ol i no save salim long ol manmeri.” Ol i ting pasin bilong kolim nem bilong God olsem, em bai mekim na beten bilong ol i gat bikpela strong long en.

Baibel i tokim ol wokboi bilong God long mekim wok long nem bilong God, em Jehova. (Kisim Bek 3:​15; Sindaun 18:10; Aisaia 12:4; Sefanaia 3:⁠9) Long Baibel Hibru bilong pastaim tru, ol i kamapim dispela nem inap 7,000 taim. Tasol Baibel i toksave olsem yumi no ken mekim wok nogut long nem bilong God. Namba tri lo bilong Tenpela Lo i tok: “Yupela i no ken kolim nating nem bilong mi God, Bikpela bilong yupela. Long wanem, bai mi mekim save long ol manmeri i kolim nating nem bilong mi.” (Kisim Bek 20:⁠7) Olsem wanem wanpela man inap kolim nating nem bilong God? Wanpela buk bilong lain The Jewish Publication Society i tok olsem, dispela tok Hibru ol i tanim olsem “kolim nating” inap makim pasin bilong kolim nating nating nem bilong God, na tu, em i makim pasin bilong “kolim nating nating beten i no gat as bilong en.”

Olsem na yumi mas ting olsem wanem long dispela kain beten bilong stretim ol samting? Dispela pasin i bin kamap olsem wanem? Long ol yia namel long 1100 na 1200 C.E. samting, narapela kain lotu Juda, ol i kolim Kabala, em i go bikpela. Long yia 1550 samting, wanpela rabai, em Aisak Luria, em i mekim wanpela kain pasin bilong beten ol i kolim “tikunim” i kamap hap bilong lotu bilong ol Kabala. Ol i mekim wok long nem bilong God olsem wanpela tok majik samting i gat strong, na dispela pasin i kamap hap lotu bilong ol lain Kabala. Yu ting dispela i rot stret bilong kolim nem bilong God o nogat?​—⁠Lo 18:​10-​12.

Maski yu gat wanem bekim bilong dispela askim, yu bai wanbel olsem dispela pasin bilong kolim nem bilong God long ples klia ol i bin mekim long Israel bilong nau, em i wanpela samting i no bin kamap bipo. Tasol God yet i tok: “Na long dispela taim bai yupela i singim song olsem, ‘Kolim nem bilong Bikpela na singaut long em na tok tenkyu long em. Tokaut long olgeta lain manmeri long ol bikpela wok em i bin mekim, na tokim ol long em i gat biknem. Singim ol song na litimapim nem bilong Bikpela. Em i kisim biknem long ol gutpela gutpela wok em i mekim.”​—⁠Aisaia 12:​4, 5.

Ol Witnes Bilong Jehova long Israel ol i wok strong tru long helpim ol manmeri long kisim stretpela save long Jehova, wankain olsem ol narapela i mekim long 230 samting kantri. Ol i laik bai planti manmeri moa i ken pilim tru insait bilong ol skripsa olsem Song 91:14: “Bai mi kisim bek ol man i laikim mi tru, na bai mi lukautim gut ol man i save tru long [“nem bilong” NW ] mi.”

[Futnot]

[Piksa long pes 28]

Hia long Negev, lain bilong Jehova ol i tokaut long nem bilong em na long ol tok bilong em long Baibel

[Piksa long pes 29]

Wanpela pepa i gat nem bilong Jehova long en