Ol i “Pret Long God”

TAIM ol Israel i stap kalabus long Isip, tupela meri i save helpim ol meri Hibru long karim pikinini, em Sifra na Pua, tupela i bin kisim wanpela hevi. Ol man bilong narapela kantri i kamap planti hariap tru, na king i laik pasim dispela samting, olsem na em i tokim dispela tupela meri: “Taim yutupela i helpim wanpela meri Hibru i karim pikinini, sapos meri i karim pikinini man, orait yutupela i mas kilim dispela pikinini i dai.”​—⁠Kisim Bek 1:​15, 16.

Sifra na Pua i “pret long God” na tupela i sanap strong na ol “i no bihainim tok bilong king.” Ol i no kilim i dai ol dispela pikinini man, maski ol inap kisim bagarap long dispela pasin ol i mekim. Jehova “i mekim gut long tupela meri” long gutpela wok ol i mekim bilong lukautim ol pikinini na ol i stap laip.​—⁠Kisim Bek 1:​17-21.

Dispela stori i kamapim klia pasin bilong Jehova long amamas long ol man i mekim wok bilong em. Tru, dispela samting Sifra na Pua i mekim, ol i bin strongim bel na mekim, tasol Jehova inap ting olsem tupela i gat laik long helpim ol pikinini na ol i mekim. Yumi save, meri i gat gutpela tingting em i no inap kilim i dai ol liklik pikinini! Tasol Jehova i tingim olsem i gat sampela man i bin mekim dispela pasin nogut tru taim ol i pret long ol man. Em i save olsem pasin bilong tingim narapela man na pasin bilong pret long God na lotuim em i bin kirapim dispela tupela meri long mekim olsem.

Yumi amamas tru long mekim wok bilong wanpela God i save tingim tru ol gutpela pasin yumi mekim! Tru, ating kain traim olsem i bin painim Sifra na Pua i no bin painim wanpela bilong yumi. Tasol taim yumi sanap strong na mekim ol samting i stret​—⁠maski yumi stap long skul, long ples wok bilong yumi, o long ol narapela taim​—⁠Jehova i no save lusim tingting long pasin bilong yumi long laikim tru narapela man na stap gut long em. Na em i “save mekim gut tru long ol man i wok long painim em.” (Hibru 11:⁠6) Em nau, “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”​—⁠Hibru 6:⁠10.