Winim Ol Hevi Bilong Mekim Bikpela Long Ol Pikinini
LONG nau, wok bilong mekim bikpela long ol pikinini taim ol i gat 13 i go inap 19 krismas samting, em i wanpela bikpela wok tru bilong ol papamama. Nius The Gazette bilong Montriol, Kanada, i tok, pasin bilong ol yangpela long kisim drak na dring em i kamap olsem wanpela ‘pasin bilong ol yangpela.’ Dispela nius i tok, ol papamama “i gat wok long was gut long ol senis i wok long kamap long pasin bilong ol pikinini bilong ol.”
Ol papamama i mas was gut long wanem ol pasin inap kamapim klia ol dispela hevi bilong ol yangpela? Wanpela lain (American Academy of Child and Adolescent Psychiatry) i bin kamapim sampela mak long ol samting bilong skin na tingting na bel, na ol samting long sindaun bilong man em papamama inap luksave long en, olsem: Skin bilong ol i les long olgeta taim, pasin bilong ol i senis, planti taim ol i stap insait tasol long rum bilong ol, pasin bilong sakim tingting bilong ol papamama, polis i holim ol taim ol i mekim sampela pasin i no stret.
Olsem wanem ol papamama i ken lukautim pikinini bilong ol bambai pasin bilong kisim dring na drak na ol hevi nogut i save kamap long dispela pasin em i no ken bagarapim ol pikinini? Dokta Jeffrey L. Derevensky, wanpela tisa long Yunivesiti Mekgil, em i bilip olsem taim ol papamama i toktok gut wantaim ol pikinini na helpim ol long kisim pasin bilong daun long ol narapela taim ol i liklik yet, dispela bai helpim ol pikinini na bai planti hevi i no ken painim ol long bihain. Nius The Gazette i tok moa, maski taim ol i wok long i go bikpela na tingting bilong bihainim laik bilong ol yet i wok long kamap, ol papamama i mas wok yet long “stiaim, na helpim, na stretim ol long pasin sori.” Tingting bilong dispela man i stret wantaim wanpela savetok bilong Baibel, olsem: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Sindaun 22:6) God i laik bai ol papamama i stap olsem gutpela piksa, poroman, man bilong toktok gut wantaim, na ol tisa bilong ol pikinini.—Lo 6:6, 7.