“Olsem Wanem Yumi Ken Kirapim Ol Wanlotu Long Hap Yumi Lukautim?”
WANPELA nius bilong lotu Katolik bilong Frans (Famille Chrétienne [Famili Kristen]), i mekim dispela askim, tasol planti man i no kirap nogut long dispela askim. Kadinal Hume bilong Briten i bin tok tu long ol manmeri long hap em i lukautim olsem ol i “lain bilong slip tumas.” Ol i tok long kamapim ol liklik grup bilong autim gutnius long ol narapela na dispela bai mekim na ol man i no ken slip. Wanpela pris bilong Itali i kolim dispela kain wok olsem “nupela pasin bilong autim gutnius stret long ol man.” Tru, i no longtaim i go pinis na pop i strongim ol man long bihainim dispela pasin bilong autim gutnius, tasol i no olgeta man i ting ol i gat wok long autim bilip bilong ol.
Pigi Perini em wanpela pris long Milan, na i no longtaim i go pinis em i bin i go long Afrika na long dispela hap wanpela sister bilong misin i tokim em olsem: “Mi bin stap long hia inap 40 yia, na mi bin strong tru na mi no kolim nem bilong Jisas, nogut mi bagarapim pasin bilong ples bilong ol lain Afrika.” Pris i pinisim tok olsem: “Mipela i no save toktok moa long Jisas, mipela i no save autim tok moa long Jisas, mipela i no save autim gutnius moa!” Tasol long i stap bilong sampela, wok autim tok i wanpela bikpela wok, na taim ol i mekim dispela wok ol i no slip long ol samting bilong spirit. Pigi Perini i tok: “Yu bai bungim tupela man i save toktok long Krais long maket, o ol i karim Baibel long han bilong ol, na yu bai tokim yu yet olsem: Lukim, em ol Witnes Bilong Jehova!”
Planti milion manmeri i save amamas long toktok long tok bilong God wantaim ol Witnes Bilong Jehova. Ating ol i bin stretim rot bilong toktok wantaim ol man long Baibel long hap bilong yu. Olsem long taim bilong ol aposel, ol dispela Kristen i save givim bel long autim tok, ol i save strongim ol narapela Kristen long autim bilip bilong ol long ol narapela man. Ples bilong ol long mekim miting (ol i kolim Haus Kingdom) em ples bilong amamas na poroman wantaim. Olsem wanem? Yu inap i go long wanpela miting em ol Witnes Bilong Jehova i kamapim na yu ken kisim save long rot bilong daunim pasin bilong slip long ol samting bilong spirit?