Ripot Long Wok Bilong Kingdom
‘Yu Save Gut Long Ol Tok Bilong Baibel’
TAIM Jisas i gat 12-pela krismas em i strongim bel na toktok wantaim ol bikman bilong lotu long Jerusalem, na “ol man i harim tok bilong en, ol i kirap nogut long save bilong en na long tok em i bekim long ol.” (Luk 2:47) Olsem tasol long nau, planti yangpela wokboi bilong Jehova ol i strongim bel na toktok wantaim ol tisa na wanskul bilong ol long God na long Baibel, na planti taim ol gutpela samting i save kamap long dispela.
Tiffany, em i gat 14 krismas, em i stap long wanpela klas na long dispela klas ol i stori long tok profet bilong Baibel long Daniel 9:24-27 i toktok long 70 wik o yia. Tisa i kamapim sampela tok tasol bilong ol dispela ves na em i no stori gut long en.
Pastaim, Tiffany i surik long putim han. Em i tok: “Tisa i no kamapim gut insait bilong ol dispela ves na mi no amamas long dispela. Na kwiktaim han bilong mi i go antap.” Planti sumatin i hatwok long kisim gut insait bilong dispela stori, olsem na tisa i kirap nogut olsem i gat wanpela i gat sampela tok long dispela samting.
Tisa i orait long Tiffany i kamapim gut insait bilong dispela tok profet, na em i kirap sanap na mekim tok long tingting tasol. Taim em i pinis long toktok, olgeta manki long klas i no mekim wanpela tok. Tiffany i pret liklik. Orait nau ol wanklas i kirap paitim han inap longpela taim.
Tisa i tok planti taim olsem: “Em i gutpela tru, Tiffany, em i gutpela tru.” Tisa i tokaut olsem em i save i mas i gat sampela tok moa bilong kamapim insait bilong ol dispela ves, tasol Tiffany em namba wan meri long kamapim klia insait bilong dispela tok long em. Bihain taim skul i pinis, tisa i askim Tiffany long olsem wanem na em i save gut long ol tok bilong Baibel.
Tiffany i tok: “Mi inap kamapim ol dispela tok, long wanem, mi wanpela Witnes Bilong Jehova. Papamama i bin stori long mi long dispela tok profet planti taim na bihain mi kisim gut.”
Ol wanklas tu ol i bin kirap nogut long save bilong em long Baibel. Wanpela sumatin i tok long Tiffany: “Nau mi save long as na ol Witnes Bilong Jehova i save go long haus bilong ol man; yupela i mekim olsem, long wanem, yupela i save gut long ol tok bilong Baibel.” Sampela i tok promis olsem ol i no inap tok bilas moa long ol bilip bilong em.
Taim Tiffany i tokim papamama bilong em long samting i bin painim em, ol i tokim em long tilim buk Save i Bringim Man Long Laip Oltaim long tisa bilong em. Taim em i tilim buk na soim tisa long dispela hap i kamapim insait bilong tok profet bilong Daniel, tisa i amamas long kisim buk na em i tok tenkyu long Tiffany.
Tru tumas, taim ol yangpela Kristen i strongim bel na tokaut long ol samting papamama bilong ol i bin lainim ol long God na long Baibel, ol i save litimapim nem bilong Jehova, na tu, ol yet i kisim blesing.—Matyu 21:15, 16.