Yu Ken Mekim Wanem na Bai i Stap Bilong Yu i Gat As Tru Bilong En?
PE TRU bilong sampela samting em i no stap ples klia long olgeta taim. Long Amerika nambawan bikpela pepa mani em i wanpela 10,000 dola pepa mani. Tasol pe bilong pepa ol i wokim dispela mani long en, em inap sampela toea tasol.
Olsem wanem? Sampela taim yu bin tingting olsem, ol hap pepa, olsem mani, ol inap mekim na bai i stap bilong yu i gat as tru bilong en? Planti manmeri i ting olsem. Planti milion manmeri i wok long san na long nait bambai ol i ken kisim olgeta mani ol i inap kisim. Sampela taim ol i wok strong long kisim mani na nau ol i kisim sik, o ol poroman i lusim ol, o ol i no stap gut wantaim famili bilong ol. Na dispela i save mekim wanem long ol? Mani o ol samting yumi baim long mani em inap mekim na bai yumi stap amamas tru long olgeta taim bihain?
Ol saveman i tok, sapos yumi wok strong long painim amamas long rot bilong mani kago bai yumi hatwok moa long painim. Niusman Alfie Kohn i tok: “Yu no inap baim amamas. . . . Ol manmeri i ting planti mani kago em i bikpela samting long i stap bilong ol, planti taim ol i save tingting planti na bel hevi na ol i no amamas olsem ol narapela man.”—Nius International Herald Tribune.
Maski ol saveman i save, mani tasol i no inap mekim na bai i stap bilong man i gat as bilong en, tasol planti manmeri ol i gat narapela tingting. Yumi no kirap nogut long dispela samting, long wanem, long ol kantri long hap bilong Wes, long olgeta de ol man bai harim o lukim 3,000 toksave i kirapim ol long baim ol samting. Maski ol i laik grisim ol man long baim ol ka o ol loli, bikpela tingting ol i laik givim long ol man i olsem: ‘Baim dispela samting na bai yu stap amamas moa.’
Dispela pasin bilong kirapim ol man long tingim tumas ol kago samting i save mekim wanem long ol man? Planti taim ol man i givim baksait long ol samting bilong spirit! Nius Newsweek i tok, asbisop bilong Kolon, Jemani, i bin tok olsem: “Long taim bilong yumi ol man i no save toktok wantaim ol narapela man long God.”
Ating yu givim klostu olgeta strong bilong yu long mekim wok mani. Na yu pilim olsem yu no gat taim bilong mekim narapela samting. Tasol ating sampela taim yu save pilim olsem i mas i gat wanpela samting i winim pasin bilong wok long olgeta taim i go inap sik o lapun i pasim yu.
Olsem wanem? Sapos yu tingim moa ol samting bilong spirit, dispela bai mekim amamas bilong yu i go bikpela moa? Wanem samting inap mekim na bai i stap bilong yu i gat as tru bilong en?