Meri i Painim Painim na i Kisim Gutpela Samting
“JEHOVA? Jehova em i husat?” Silvia i gat 8-pela krismas, na em i lukim dispela nem long wanpela Baibel Amenia, wanpela liklik meri i bin soim long em. Em i askim askim ol man long hap em i sindaun long en long Yerevan, Amenia, olsem Jehova em i husat, tasol no gat wanpela i bin tokim em—papamama bilong em, ol tisa bilong em, ol pasto long wanpela lotu long hap bilong em, ol tu i no tokim em.
Silvia i go bikpela, em i pinisim skul, na em i kisim wanpela wok, tasol em i no save yet olsem Jehova em i husat. Taim em i kamap yangpela meri pinis, em i mas ranawe lusim Amenia, na bihain em i go sindaun long Polan na em i stap long wanpela liklik rum wantaim sampela refyuji moa. Long olgeta taim sampela lain i save kam lukim wanpela meri em i save sindaun wantaim long dispela rum. Silvia i askim dispela meri: “Husat ol dispela lain i save kam lukim yu?” Dispela meri i tok: “Em ol Witnes Bilong Jehova, ol i kam long lainim mi long Baibel.”
Silvia i amamas tru taim em i harim dispela nem Jehova. Nau em i kirap long kisim save olsem Jehova em husat na em i God bilong laikim ol narapela. Tasol i no longtaim na em i mas lusim Polan. Em i go hait na sindaun long Denmak, long hap bilong solwara Boltik. Em i kisim sampela samting tasol bilong em i go, tasol em i kisim tu ol buk na nius bilong Baibel i go, em ol Witnes Bilong Jehova i bin wokim. Long baksait bilong wanpela nius, Silvia i painim lista i gat ol atres bilong ol brens-ofis bilong Sosaiti Was Taua. Dispela em i bikpela samting tru long em—em i bilong helpim em long save long Jehova!
Long Denmak, ol i kisim Silvia i go long kem bilong ol refyuji, na wantu em i kirap painim ol Witnes Bilong Jehova. Em i save brens-ofis bilong Sosaiti Was Taua long Denmak i stap long taun Holbek, long wanem, em i bin lukim long lista i gat ol atres. Tasol Silvia i no save brens i stap long wanem hap. Ol i salim Silvia i go long narapela kem na em i go long tren, na tren i ran i go na brukim taun Holbek na i go long dispela kem! Nau bel bilong em i amamas tru.
Bihain liklik, long wanpela taim em san i lait gut, Silvia i kisim tren i go bek long Holbek na em i wokabaut i go long brens-ofis. Em i tok: “Taim mi go insait long gaden, mi sindaun long sia na mi tok olsem, ‘Man! Dispela em paradais!’ ” Ol i amamas long em i kam long brens-ofis, na nau em inap stadi long Baibel wantaim ol Witnes Bilong Jehova.
Tasol ol i salim em i go long narapela narapela kem planti taim. Long ol dispela kem em i go i stap long en, Silvia i painim ol Witnes Bilong Jehova na em i wok long kirap gen long stadi long Baibel. Inap 2-pela yia em i bin stadi na em i lain long planti samting inap long em i ken kisim baptais. Em i baptais na bihain em i mekim wok bilong autim tok long olgeta de. Long 1998 gavman bilong Denmak i orait long em i ken stap long Denmak.
Nau Silvia i gat 26 krismas na em i wok long dispela ples em i bin tingim i olsem paradais, em long brens-ofis bilong ol Witnes Bilong Jehova long Denmak. Em i tok: “Bai mi tok wanem? Kirap long taim mi liklik meri yet, mi bin wok long painim Jehova. Nau mi painim em pinis. Mi bin tingting strong long mekim wok bilong em, na nau mi stap long Betel. Mi beten askim Jehova long dispela ples i ken kamap ples bilong mi inap planti yia!”