Katim Man na No Ken Givim Blut—“Wanpela Bikpela Pasin Ol Dokta i Bihainim”
LONG nius Maclean’s aninit long het-tok, “Katim Man na ‘No Gat Wok Long Blut,’ ” ol i tok olsem ol dokta long Kanada i bin “kamapim ol nupela pasin bilong mekim wok bilong ol. Olsem na insait long 5-pela yia i go pinis, wok bilong katim man na no gat wok long blut i kamap olsem wanpela bikpela pasin ol dokta i bihainim long nau.” Wanpela bilong ol dispela dokta em Brian Muirhead, em i wanpela dokta bilong mekim i dai tingting bilong sikman long wanpela haus sik (Winnipeg’s Health Sciences Centre). Wanem samting i bin kirapim em long painim narapela rot bilong helpim sikman na no gat wok long blut?
Long 1986, Dokta Muirhead i orait long katim wanpela man i gat 70 krismas, em blut bilong em i wok long lus long sua i stap insait long bel. Em i wanpela Witnes Bilong Jehova na Baibel i as bilong ol bilip bilong em, olsem na em i tokim ol dokta ol i no ken givim blut long em. (Aposel 15:28, 29) Nius Maclean’s i tok, Dokta Muirhead “i bihainim wanpela pasin ol i no save bihainim planti taim. Em i putim wanpela kain wara i gat sol insait long rop bilong blut bilong sikman bambai mak bilong blut i ken stap strong. Dispela pasin i wok gut na i strongim tingting bilong Muirhead, em tingting bilong em i olsem: ‘Planti taim tumas mipela i save givim blut long ol man. Mi ting em taim bilong painim ol narapela rot bilong helpim ol sikman.’ ”
Wok bilong painim rot bilong helpim sikman na no gat wok long blut “i go bikpela moa, long wanem, ol i ting ol haus sik bai sot long blut long bihain, na tu, planti sikman i pret long kisim jem bilong sampela sik long rot bilong blut.” I gutpela tru ol dokta i traim ol nupela samting, na dispela i bin helpim ol Witnes Bilong Jehova na planti narapela man tu. Nius Maclean’s i tok: “Dispela i mekim na planti taim ol dokta i no gat wok long givim blut long sikman, na tu, pasin bilong katim man na no gat wok long blut i helpim planti man long abrusim ol sik ol inap kisim long rot bilong blut i gat jem long en.” Tasol blut i “no gat jem long en” inap kamapim sik, long wanem, inap liklik taim blut bilong narapela man i daunim strong bilong skin bilong sikman long sakim ol sik.
Wanem samting i as bilong strongpela tingting bilong ol Witnes Bilong Jehova long yusim ol narapela pasin bilong helpim sikman na no gat wok long blut? Ating bai yu laik ritim liklik buk How Can Blood Save Your Life? Ol Witnes Bilong Jehova bai amamas long givim wanpela long yu.