Wanpela Bung Yu No Ken Lusim

“Olgeta gutpela samting yumi save kisim na olgeta presen i gutpela tru” i kam long God, Papa bilong yumi long heven.​—⁠Jems 1:⁠17.

NAMBAWAN gutpela presen God i givim long yumi ol sinman na bai yumi ken kamap gutpela gen em laip bilong dispela wanpela Pikinini bilong em, Jisas Krais. Long rot bilong i dai bilong Jisas, em Man bilong baim bek yumi, yumi inap kisim laip i stap gut oltaim long Paradais long graun. Long Luk 22:​19, Jisas i tokim yumi long tingim i dai bilong em.

Ol Witnes Bilong Jehova i laik singautim yu i kam bung wantaim ol na bihainim dispela tok bilong Jisas. Dispela bung ol i save mekim long olgeta yia em bai kamap taim san i go daun pinis long Sande, Epril 8, 2001, em Nisan 14 long kalenda bilong Baibel. Makim dispela de long kalenda bilong yu na bai yu no lusim tingting long en. Ol Witnes Bilong Jehova long hap bilong yu inap tokim yu long ples na taim stret bilong bung.