Ripot Long Wok Bilong Kingdom
Ol i Givim Medal Bilong Tok Amamas Long Wanpela Haus Kingdom
WANPELA lain (Ministry of Environment) long Finlan i makim yia 2000 olsem “Yia Bilong Stretim Ples na Wokim Ol Gaden Bilas.” Wanpela bilong ol lain i go pas long dispela samting em i tok olsem “as na ol i putim dispela nem long dispela yia, em bilong kirapim yumi olgeta long tingim olsem wanem ol diwai na plaua samting i save helpim i stap bilong yumi.”
Long Janueri 12, 2001, brens-ofis bilong ol Witnes Bilong Jehova long Finlan i kisim pas long wanpela lain (Finnish Association of Landscape Industries). Dispela pas i stori olsem, ol i bin makim Haus Kingdom bilong ol Witnes Bilong Jehova long Tikkurila long kisim wanpela bilong ol dispela medal, long wanem, graun arere long en i gat narakain gutpela stail na i gat ol gutpela gaden bilas. Pas i tok moa olsem “Haus Kingdom na hap em i sanap long en i luk naispela tru na ol man i lukim ol i amamas, maski em long taim bilong san o taim bilong kol.”
Ol i givim dispela medal long ol Witnes Bilong Jehova long Rosendahl Hotel long Tampere, Finlan, na long dispela bung i gat 400 saveman na ol bisnisman i stap. Dispela lain (Finnish Association of Landscape Industries) i putim dispela stori tu long ol nius, na stori i tok olsem: “Long planti hap bilong kantri, ol Witnes Bilong Jehova i save tingim gut ol naispela stail bilong wokim ol Haus Kingdom bilong ol. Pasin bilong lukautim gut ples na ol diwai na plaua samting i kirapim amamas long bel bilong man taim em i wokabaut long dispela hap. Haus Kingdom long Tikkurila i gat wanpela gutpela gaden tru. Dispela haus na bikpela gaden bilong en i mekim bel bilong man i stap isi.”
Long Finlan i gat 233 Haus Kingdom, na planti bilong ol i stap namel long ol gutpela gutpela gaden. Tasol samting i mekim na ples i naispela tru, em ol i haus bilong mekim lotu i tru na kisim save long Baibel. Winim siks milion Witnes Bilong Jehova long olgeta hap bilong graun, ol i laikim tru Haus Kingdom, maski Haus Kingdom i gat planti gutpela bilas o liklik bilas tasol. Dispela i as na ol i amamas long lukautim gut Haus Kingdom. Ol dua bilong Haus Kingdom i op long olgeta manmeri long komiuniti bilong yu!