Makim Rot Bilong Laip Oltaim

LONG nau ol man i gat planti samting ol inap skelim na makim samting ol i laik mekim, winim long bipo. Olsem: Wanem kain klos bai yumi pasim, wanem kaikai bai yumi kisim, na bai yumi kisim wok we na stap we, planti taim dispela em ol samting yumi save skelim na makim. Long planti hap bilong graun, pasin bilong makim poroman marit bilong yu yet em tu i wanpela pasin tasol bilong ples. Tasol Baibel i soim yumi wanpela rot i winim tru ol narapela rot yumi ken makim​—⁠em wanpela rot olgeta man inap makim long bihainim.

Baibel i tok: “Ol man i strong long bihainim stretpela pasin, ol bai i kisim laip. Tasol ol man i strong long mekim pasin nogut, ol bai i dai.” (Sindaun 11:19) Na Jisas Krais i tok: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

Yes, Man bilong wokim yumi i givim rot long yumi bilong makim wanpela rot em inap bringim yumi long laip oltaim! Yumi mas mekim wanem bilong kisim laip oltaim?

Olsem Baibel i tok, “man i bihainim stretpela pasin em bai i kisim laip na i stap gut.” (Sindaun 12:28) Yumi ken i stap namel long ol stretpela man em ol i wokabaut long rot bilong laip oltaim. Olsem wanem yumi ken mekim olsem? Yumi ken mekim olsem taim yumi was gut long ol samting yumi mekim bambai i stap bilong yumi i stret long laik bilong God na ol lo bilong em. (Matyu 7:​13, 14) Olsem na yumi mas makim rot i stret long bihainim na kisim presen bilong God, em laip oltaim.​—⁠Rom 6:⁠23.