Askim

Olsem wanem? Satan inap lukim tingting bilong man?

Yumi no save tru tru, tasol i luk olsem Satan na ol spirit nogut i no inap lukim tingting bilong yumi.

Tingim ol nem bilong Satan. Baibel i kolim em olsem Satan (Birua), Man i save kotim ol man, Snek (wankain olsem Man bilong giamanim ol man), Man bilong traim ol man, na Man bilong tok giaman. (Jop 1:6; Matyu 4:3; Jon 8:​44; 2 Korin 11:3; KTH 12:⁠9) I no gat wanpela bilong ol dispela nem i makim olsem Satan inap lukim tingting bilong man.

Tasol God Jehova inap “lukim tingting na laik bilong man.” (1 Samuel 16:7; Sindaun 17:3; 1 Stori 29:17) Hibru 4:13 i tok: “I no gat wanpela samting God i bin wokim, em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” Jehova i bin givim dispela strong bilong skelim bel bilong ol man long Pikinini bilong em, Jisas. Jisas i kirap bek pinis i tok: “Mi save skelim gut bel na tingting bilong olgeta man. Na bai mi givim pe long yupela wan wan, inap long pasin yupela i mekim.”​—⁠KTH 2:⁠23.

Baibel i no tok Satan inap skelim bel na tingting bilong ol man, nogat. Dispela em bikpela samting, long wanem, aposel Pol i tokim yumi ol Kristen olsem ‘yumi save long tingting na pasin bilong [Satan].’ (2 Korin 2:11) Olsem na yumi no ken pret olsem Satan i gat sampela kain pawa em yumi no save long en.

Tasol dispela i no makim olsem Birua bilong yumi i no inap luksave long ol pasin kranki bilong yumi. Inap planti handet yia Satan i bin luksave long pasin bilong ol man. I no olsem em i mas lukim tingting bilong yumi bilong save long pasin tru bilong yumi, na ol amamas yumi save laikim, na ol samting yumi stori long en, na ol narapela samting olsem, nogat. Lukluk bilong pes na bodi bilong yumi inap kamapim tingting na laik bilong yumi.

Klostu long olgeta taim Satan i save mekim wok long wankain samting em i bin mekim wok long en long gaden Iden​—⁠pasin bilong giaman. (Stat 3:​1-5) Ol Kristen i no gat wok long pret long Satan inap lukim tingting bilong ol, tasol i gat as long ol i mas was gut long wanem ol tingting Satan inap putim insait long tingting bilong ol. Em i laik bai tingting bilong ol Kristen “i paul olgeta, na ol i no save liklik long tok i tru.” (1 Timoti 6:⁠5) Olsem na yumi no kirap nogut olsem graun bilong Satan i gat planti save na amamas bilong bagarapim tingting. Bilong sanap strong na winim dispela samting bilong bagarapim tingting, ol Kristen ‘i mas tingting long God i kisim bek ol na putim i stap olsem hat kapa.’ (Efesus 6:17) Ol i mekim olsem long rot bilong pulimapim tingting bilong ol long ol tok i tru bilong Baibel na sakim ol samting nogut bilong dispela graun bilong Satan em inap bagarapim tingting bilong ol.

Satan em i wanpela birua nogut. Tasol yumi no ken pret long em na ol spirit nogut bilong em. Jems 4:7 i tok: “Sakim Satan, na em bai i lusim yupela na ranawe.” Sapos yumi bihainim dispela tok, yumi inap mekim wankain tok olsem Jisas i mekim, olsem Satan i no gat strong long mekim wanpela samting long yumi.​—⁠Jon 14:30.