“Tupela Meri i Paitim Dua Bilong Mipela”

“TUPELA yia i go pinis, liklik pikinini meri bilong mipela i dai na mipela i bel hevi tru.” Dispela em kirap bilong wanpela pas i stap long niuspepa Le Progrès, long Saint-Étienne, Frans.

“Mélissa i gat tripela mun taim em i dai. Em i bin karim hevi bilong wanpela bikpela sik (trisomy 18). Bel hevi mipela i bin kisim long dispela hevi i no inap pinis kwiktaim​—⁠mipela i pilim olsem i no stret dispela samting i bin kamap. Maski mipela i kamap bikpela long lotu Katolik, mipela i wok long kisim tingting olsem, ‘God, sapos yu stap, bilong wanem yu larim kain samting olsem i kamap?’ ” Yumi lukim klia olsem dispela mama husat i raitim dispela pas, em i bel hevi tru na i no gat helpim. Pas bilong em i tok moa olsem:

“Liklik taim bihain long dispela samting i kamap, tupela meri i kam paitim dua bilong haus bilong mipela. Kwiktaim mi luksave long ol olsem ol i Witnes Bilong Jehova. Mi redi long rausim ol, tasol mi lukim wanpela buklet ol i holim. Dispela buklet i stori long as na God i larim pen na hevi i stap. Olsem na mi larim ol i kam insait bambai mi ken soim ol olsem tingting bilong ol i no stret. Mi ting olsem famili bilong mi i bin karim planti hevi tumas, na mipela les pinis long harim kain tok olsem ‘God i givim em long mipela, na God i kisim em bek.’ Ol Witnes i stap winim wan-pela aua. Ol i putim yau long tok bilong mi na ol i sori long mi, na taim ol i laik lusim mi, bel bilong mi i pilim gutpela tru, olsem na mi orait long ol i ken kam bek gen. Dispela samting i bin kamap inap 2-pela yia i go pinis. Mi no kamap wanpela Witnes Bilong Jehova, tasol mi bin kirap long stadi long Baibel wantaim ol na planti taim mi go long ol miting bilong ol.”