Tingting Bilong God Long Ol Man i Dai Pinis

TRU TUMAS, bel bilong yumi i save bagarap tru taim wanpela long famili yumi laikim em tumas em i dai. Yumi pilim olsem yumi stap wanpis, i no gat wanpela samting i stap, na yumi bel hevi tru. Maski yumi gat bikpela mani o strong, yumi no inap helpim man i dai pinis​—⁠i no gat wanpela man nau long graun inap givim bek laip long man i dai.

Tasol, Man i wokim yumi i gat narapela tingting. Em i wokim namba wan man long graun, na em inap tu long wokim gen man i dai pinis. Long dispela as, God inap tingim ol daiman olsem ol i stap laip. Long ol gutpela wokman bilong God bilong bipo, Jisas i tok: “Long ai bilong [God], olgeta manmeri i stap laip,” o i olsem ol i stap laip long tingting bilong God.​—⁠Luk 20:⁠38.

Taim Jisas i stap long graun, em i kisim strong bilong kirapim bek ol daiman. (Jon 5:21) Em i gat wankain tingting long Papa bilong em long ol man i stap gut na ol i dai. Olsem: Taim pren bilong em Lasarus i dai, Jisas i tokim ol disaipel: “Lasarus i slip. Tasol bai mi go na kirapim em.” (Jon 11:11) Long tingting bilong ol man, Lasarus i dai, tasol long tingting bilong Jehova na Jisas, Lasarus i slip.

Taim Kingdom bilong Jisas i bosim graun, bai i gat kirap bek bilong “ol stretpela man na ol man nogut wantaim.” (Aposel 24:15) Bihain, ol man i kirap bek bai kisim skul long God na ol inap kisim laip oltaim long graun.​—⁠Jon 5:​28, 29.

Tru tumas, dai bilong famili inap givim yumi bikpela bel hevi na em inap i stap planti yia. Tasol sapos yumi save long tingting bilong God long man i dai pinis, dispela inap mekim gut bel bilong yumi na strongim yumi long wetim gutpela samting long bihain.​—⁠2 Korin 1:​3, 4.