Samting Tru Bilong Helpim Ol Rabisman
TAIM Jisas Krais, em Pikinini bilong God, i bin i stap long graun, em i soim olsem em i laik tru long helpim ol rabisman. Wanpela man i bin lukim long ai bilong em yet wok autim tok Jisas i mekim, em i tok: “Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.” (Matyu 11:5) Tasol, olsem wanem long planti milion manmeri i stap rabis long nau? I gat wanpela gutnius i stap bilong helpim ol? Yes, i gat wanpela tok bilong helpim ol long wetim gutpela samting bai kamap!
Tasol maski planti taim ol man i sakim ol rabisman na lusim tingting long ol, Tok Bilong God, em Baibel, i promis olsem: “Oltaim God i no save lusim tingting long ol rabisman. Ol man i gat bikpela hevi ol i save bilip long God na wetim em i helpim ol. Na em bai i no inap larim ol i wet nating.” (Song 9:18) Ol dispela tok bilong mekim gut bel bilong ol bai kamap tru long taim Kingdom bilong God, em gavman tru i stap long heven, bai senisim olgeta gavman bilong ol man. (Daniel 2:44) Jisas, em i King bilong dispela gavman bilong heven, bai “sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:13, 14.
Olsem wanem long i stap bilong ol man taim Krais i bosim graun? Ol man i stap aninit long wok bos bilong Krais, ol bai amamas long kisim ol samting i kamap long wok bilong ol yet. Baibel i tok long Maika 4:3, 4: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret. Bikpela I Gat Olgeta Strong i bin promis long mekim ol dispela samting.” Na tu, Kingdom bilong God bai pinisim hevi bilong sik na dai. (Aisaia 25:8) Man! Graun bai kamap gutpela tru! Yumi ken bilip long ol dispela tok promis, long wanem, God yet i bin kamapim ol.
Antap long dispela wok bilong givim tok long ol man i ken wetim gutpela samting i kamap, Baibel i helpim yumi long karim hevi bilong olgeta wan wan de, long olsem wanem bai yumi daunim pasin bilong sem long yumi yet, ating yumi sem, long wanem, yumi stap rabis. Long rot bilong stadi long Baibel Kristen i sot long samting i kisim save olsem, em i gutpela samting long ai bilong Jehova wankain tasol long Kristen i gat planti samting. Buk Jop i tok God “i bin wokim olgeta manmeri, na long ai bilong en olgeta i wankain tasol, maski ol i gat planti samting o ol i no gat samting.” (Jop 34:19) Pasin bilong God long laikim tupela lain i wankain tasol.—Aposel 10:34, 35.