Olsem Wanem? Yu Gat Pasin Bilong Pilim Tru Ol Samting i Narakain?
YU BIN luksave olsem planti taim ol man bilong raitim Baibel i bin tokaut olsem ol i pilim tru olsem ol gutpela wok na pasin bilong God i narakain? Man bilong raitim song i tok: “Olgeta samting yu wokim i narakain na i nambawan tru.” (Song 139:14) Profet Aisaia i tok: “Bikpela, yu God bilong mi, na mi laik litimapim nem bilong yu. Yu save mekim ol narakain samting tru.” (Aisaia 25:1) O tingim tok aposel Pol i bin mekim: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara!”—Rom 11:33.
Yes, taim yumi lukim ol samting i narakain na i nambawan tru, yumi save kirap nogut na pilim tru, a?
Tingim: Yumi save amamas taim yumi lukim ol liklik pikinini i kirap nogut taim ol i lukim wanpela samting ol i no bin lukim bipo o ol i lainim wanpela nupela samting, a? Tasol sori tru, dispela pasin ol pikinini i pilim taim ol i liklik, dispela i save pinis taim ol i go bikpela.
Tasol long ol dispela man bilong raitim Baibel, pasin bilong pilim ol gutpela wok bilong God i no bin pinis—em i stap yet wantaim ol. Bilong wanem i olsem? Long wanem, ol i bin wok long tingim tingim long bel ol gutpela wok bilong God. Man bilong raitim song i beten olsem: “Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.”—Song 143:5.
Em i gutpela samting tru olsem dispela pasin bilong pilim tru ol samting i narakain i stap namel long ol man i lotuim God long nau! Olsem wanem? Yu gat dispela pasin? Yu wok long kisim dispela pasin?