Tok Bilong God i Strongim Yu?
TAIM hevi i painim yu, yu save mekim wanem bilong karim dispela hevi? Taim Satan i traim Jisas, Jisas i tingim bek wanpela skripsa i stret long dispela traim na dispela i helpim em. (Matyu 4:1-11) Na olsem tasol, taim hevi i painim King Devit, Tok Bilong God i strongim em. Em i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.”—Song 94:19.
Taim hevi i painim yumi tu, pasin bilong tingim bek wanpela skripsa yumi laikim tumas em bai mekim gut bel bilong yumi na strongim yumi. Olsem: Rex, nau em i gat 89 krismas, em i bin mekim wok autim tok fultaim kirap long 1931. Tasol em i tok: “Planti taim mi bin pilim olsem mi no inap mekim gut ol spesel asainmen mi kisim long wok autim tok.” Em i mekim wanem? Em i tok: “Mi tingim bek skripsa mi laikim tumas, Sindaun 3:5, em i tok: ‘Yu mas bilip strong long Bikpela. Yu no ken ting save bilong yu yet inap helpim yu.’ Taim mi tingim dispela skripsa na bihainim, dispela i helpim mi long mekim gut ol asainmen bilong mi.”
Taim ol yangpela tu i gat wanpela skripsa ol i laikim tumas, dispela i save helpim ol. Jack, em i gat 6-pela krismas, em i tok skripsa em i laikim tumas em Matyu 24:14. Dispela skripsa i save kirapim em long autim tok wantaim papamama bilong em. Em i tok: “Mi save amamas long go autim tok olgeta Sarere wantaim mama, papa, na susa bilong mi.”
Olsem wanem? Olsem Jisas, sampela taim i gat sampela samting i traim bilip bilong yu? Sapos olsem, ating Filipai 4:13 inap kamap wanpela skripsa em yu laikim tumas. Olsem King Devit, sampela taim yu save “bel hevi”? Sapos yu tingim Filipai 4:6, 7 dispela inap helpim yu long karim dispela hevi. Sampela taim yu tingting planti olsem wok bilong God yu mekim em i lus nating? Orait tingim 1 Korin 15:58, dispela bai strongim yu.
Taim yumi lain lain long sampela skripsa i stret long ol hevi, yumi larim Tok Bilong God i wok strong i stap long laip bilong yumi. (Hibru 4:12) Kain gutpela skripsa olsem inap strongim yumi na mekim gut bel.—Rom 15:4.